India Vs Afghanistan T20 Series : ఇంటర్నేషనల్ టీ20ల్లో అఫ్గానిస్థాన్ జట్టుపై పై టీమ్ఇండియాకు అజేయ రికార్డు ఉంది. ఇప్పటివరకూ ఆ జట్టు చేతిలో మన కుర్రాళ్లు ఓడిందే లేదు. ఆ జట్టుతో ఆడిన అయిదు మ్యాచ్‌ల్లో టీమ్‌ఇండియా నాలుగింట్లో విజయం సాధించింది. ఒక్క మ్యాచ్కు మాత్రం ఫలితం తేలలేదు. అయితే ఇప్పుడు మొహాలీ వేదికగా మరోసారి అఫ్గాన్‌తో సిరీస్‌కు భారత జట్టు సిద్ధమైంది. కానీ ఈ సారి మాత్రం అఫ్గాన్లతో ఆటేం అంత సులువు కాదు. ఇటీవల వన్డే ప్రపంచకప్‌లో ఆ జట్టు ఎంతటి సంచలనాలు సృష్టించిందో ప్రత్యేకంగా చెప్పనక్కర్వేదు. పసికూన అంటూ పక్కకు నెట్టిన వాళ్లకు చుక్కలు చూపించి మరీ తమ సత్తా చాటారు అఫ్గాన్ ప్లేయర్లు. పొట్టి ఫార్మాట్లో అయితే ఆ జట్టు మరింత ప్రమాదకరంగా కనిపిస్తోంది. దీంతో టీమ్‌ఇండియా ఇక అతి విశ్వాసానికి పోకుండా జాగ్రత్తగా ఆడాల్సిన అవసరం ఉందంటూ విశ్లేషకులు సూచిస్తున్నారు.
ఆ విజయాలే కారణం : క్రికెట్ హిస్టరీలో అఫ్గానిస్థాన్ ప్లేయర్లను అంటే పసికూలని పిలిచేవాళ్లు. కానీ ఇటీవలే జరిగిన వన్డే ప్రపంచకప్‌లో ఆ జట్టు ఫామ్ చూసినత తర్వాత అందరి అభిప్రాయాల్లో మార్పు వచ్చింది. డిఫెండింగ్‌ ఛాంపియన్‌ ఇంగ్లాండ్, మాజీ ఛాంపియన్లు పాకిస్థాన్, శ్రీలంకపై ఆ జట్టు విజయాలు నమోదు చేసి ఆ జట్లను చిత్తు చేసింది. ఇక ఆస్ట్రేలియాను భయపెట్టి అఫ్గాన్ సెమీస్కు చేరేలా కనిపించింది. కానీ మ్యాక్స్‌వెల్‌ డబుల్ సెంచరీ వల్ల ఆ జట్టు ఆశలు కూలాయి.
అయితే సెమీస్ చేరకపోయినప్పటికీ ఆ జట్టు ఫామ్ అందరినీ ఆకట్టుకుంది. వన్డేల్లోనే ఇలా రాణించిన జట్టు ఇక టీ20ల్లోనూ మరింత చెలరేగే అవకాశాలు చాలానే ఉన్నాయి. దీంతో ఈ పొట్టి ఫార్మాట్లో అఫ్గాన్ జట్టును అంత తేలిగ్గా తీసుకోవడానికి వీల్లేదు. ఒక్క ఓవర్లో ఫలితాలు తారుమారయ్యే స్థితి ఈ ఫార్మాట్లో ఆ జట్టు ప్రమాదకారే.
నాణ్యమైన స్పిన్నర్లు, మంచి పేసర్లు, ఉత్తమ బ్యాటర్లు, పవర్‌ హిట్టర్లతో నిండి ఉన్న అఫ్గాన్ జట్టు ఇప్పుడు భయమన్నది లేకుండా తెగించే ఆడే సూచనలు కూడా కనిపిస్తున్నాయి. ఇటీవలే యూఏఈతో టీ20 సిరీస్‌ను 2-1తో సొంతం చేసుకున్న అఫ్గాన్ జట్టు మరింత జోరు మీదుంది. అంతకుముందు ఆసియా క్రీడల్లో ఆ దేశ యువ జట్టు శ్రీలంక, పాకిస్థాన్ లాంటి జట్లను ఓడించి వెండి పతకాన్ని దక్కించుకుంది.
ఆ ప్లేయర్ లేకపోవడం కూడా దెబ్బే: ఇంటర్నేషనల్ క్రికెట్ ఫార్మాట్లో అఫ్గాన్‌కు ప్రత్యేక గుర్తింపు తెచ్చిన ఆ జట్టు ప్లేయర్ రషీద్ ఖాన్‌ దూరమవడం ఆ జట్టుకు దెబ్బే. గతంలో జరిగిన అన్ని టీ20లు కలిపి చూస్తే అత్యధిక వికెట్లు తీసిన బౌలర్లలో రషీద్ ఖాన్‌ (65 వికెట్లు) రెండో ప్లేసులో ఉన్నాడు. 66 వికెట్లతో ఆస్ట్రేలియా ప్లేయర్ ఎలిస్‌ మొదటి స్థానంలో ఉన్నాడు. వెన్నెముక గాయం, ఆపరేషన్ కారణంగా గతేడాది జులై నుంచి అతను టీ20ల్లో ఆడలేదు.
ఇప్పుడు భారత్‌తో జరగనున్న సిరీస్‌కు రషీద్ను ఎంపిక చేశారు. కానీ గాయం నుంచి ఇంకా పూర్తిగా కోలుకోకపోవడం వల్ల అతడు జట్టుకు దూరమయ్యాడు. రషీద్ లేకపోయినప్పటికీ యువ స్పిన్నర్లు నూర్‌ అహ్మద్, ముజీబ్‌తో పాటు సీనియర్‌ స్పిన్నర్‌ నబితో భారత్‌కు సవాలు ఎదురయ్యే అవకాశాలు ఉన్నాయి. ఈ సిరీస్‌లో ఒక్క మ్యాచ్లో ఓడినా కూడా వరల్డ్కప్కు ముందు అది టీమ్‌ఇండియా ఆటగాళ్లను మానసికంగానూ దెబ్బతీసే ప్రమాదం కూడా ఉంది. అందుకే భారత్ బీ కేర్ఫుల్ అంటూ మాజీలు హెచ్చరిస్తున్నారు.
