ఆస్ట్రేలియాతో జరుగుతోన్న తొలిటెస్టు రెండోరోజు ఆటలో టీమ్ఇండియా ఫీల్డింగ్ బలహీనంగా సాగింది. ఈ నేపథ్యంలో.. ఆటగాళ్లపై భారత మాజీ క్రికెటర్ సునీల్ గావాస్కర్ ఆసక్తికర వ్యాఖ్యలు చేశాడు. ప్రస్తుతం భారత ఆటగాళ్లు క్రిస్మస్ మూడ్లో ఉన్నారని.. అందుకే.. పండుగకు వారం ముందే ప్రత్యర్థులకు తమ కానుకలను పంచుతున్నారని వ్యాఖ్యానించాడు.
గులాబి టెస్టు రెండోరోజు ఆటలో ఆతిథ్య జట్టు ఆచితూచి ఆడింది. లబుషేన్ను పెవిలియన్ చేర్చడానికి దొరికిన రెండు అవకాశాలను టీమ్ఇండియా చేజార్చుకుంది. డిన్నర్ బ్రేక్ కంటే ముందు షమీ బౌలింగ్లో లబుషేన్ బాదిన బంతిని బుమ్రా చేజార్చాడు. ఆ తర్వాత పృథ్వీ షా మరోసారి క్యాచ్ వదిలేశాడు. ఈ నేపథ్యంలో జట్టు ఆటగాళ్లను ఉద్దేశించి గావస్కర్ పై వ్యాఖ్యలు చేశాడు.
అయితే.. ఆ తర్వాత టీమ్ఇండియా సత్తా చాటింది. స్మిత్(1), హెడ్‌ (7), కామెరూన్‌ గ్రీన్‌ (11)ను పెవిలియన్‌కు చేర్చి ఆసీస్‌ను కోలుకోలేని దెబ్బతీశాడు రవిచంద్రన్ అశ్విన్. దీంతో 79 పరుగులకు సగం వికెట్లు కోల్పోయింది కంగారూ జట్టు. అనంతరం కెప్టెన్ పైన్ (73*) తప్ప ఎవ్వరూ రాణించకపోవడం వల్ల 191 పరుగులకే ఆలౌటై భారత్కు 53 పరుగుల ఆధిక్యాన్ని ఇచ్చింది.
ఇదీ చూడండి:కోహ్లీ స్టన్నింగ్ క్యాచ్ .. అభిమానులు ఫుల్ ఖుష్!
