మిర్‌పుర్‌లోని షేర్-ఏ-బంగ్లా జాతీయ స్టేడియంలో భారత్-బంగ్లాదేశ్ మధ్య రెండో టెస్టు గురువారం ప్రారంభం కానుంది. తొలి టెస్టులో 188 పరుగుల తేడాతో ఘన విజయం సాధించిన టీమ్ఇండియా.. రెండో టెస్టులోనూ గెలిచి సిరీస్‌ క్లీన్ స్వీప్ చేయాలని పట్టుదలతో ఉంది. వేలికి గాయంతో తొలి టెస్టుకు దూరమైన సారథి రోహిత్‌ శర్మ.. రెండో టెస్టుకు అందుబాటులో ఉండటం లేదు. దీంతో రెండో మ్యాచ్‌కు సైతం కేఎల్‌ రాహుల్ సారథ్యం వహించనున్నారు. అయితే ప్రాక్టిస్‌ సందర్భంగా కేఎల్‌ రాహుల్ చేతికి గాయమైనప్పటికీ.. అతడు మ్యాచ్‌కు అందుబాటులో ఉండొచ్చని బీసీసీఐ వర్గాలు తెలిపాయి. ప్రస్తుతం రాహుల్ ఫామ్‌ టీమ్‌ ఇండియాను ఆందోళనకు గురిచేస్తోంది. ఈ మ్యాచ్‌లోనైనా రాహుల్ తన పరుగుల దాహాన్ని తీర్చుకోవాలని ఆశిస్తోంది.
తొలి టెస్టులో సెంచరీలతో ఆకట్టుకున్న శుభ్‌మన్‌ గిల్‌, పుజారాలు ఈ మ్యాచ్‌లోనూ తమ ఫామ్‌ను కొనసాగించాలని పట్టుదలగా ఉన్నారు. శ్రేయస్‌ అయ్యర్‌, విరాట్‌ కోహ్లీలతో భారత్ బ్యాటింగ్‌ లైనప్‌ బలంగా కనిపిస్తోంది. అటు బౌలింగ్ విభాగంలో కుల్‌దీప్‌ యాదవ్‌ విశేషంగా ఆకట్టుకుంటున్నాడు. తన స్పిన్‌ మాయాజాలాన్ని రెండో టెస్టులోనూ... కొనసాగించాలని ఉవ్విళ్లూరుతున్నాడు. అశ్విన్‌, అక్షర్‌ పటేల్, ఉమేశ్‌ యాదవ్‌, మహ్మద్‌ సిరాజ్‌లతో భారత బౌలింగ్ దళం బలంగా కనిపిస్తోంది.
మరోవైపు, భారత్‌పై ఇప్పటివరకు ఒక్కటెస్టు మ్యాచ్‌లోనూ నెగ్గని బంగ్లాదేశ్ జట్టు రెండో టెస్టులో గెలిచి సిరీస్‌ డ్రా ముగించాలని పట్టుదలగా ఉంది. తొలి టెస్టులో చేసిన తప్పులను సరిదిద్దుకొని సిరీస్‌లో గొప్పగా పుంజుకోవాలని బంగ్లా ఆటగాళ్లు భావిస్తున్నారు. బంగ్లా బ్యాటర్లలో జాకీర్ హసన్, లిట్టన్‌ దాస్‌, ముష్ఫికర్‌ రహీమ్‌ భారత బౌలర్లకు సవాలు విసరనున్నారు. ఆల్‌రౌండ్‌ ప్రదర్శనతో ఆకట్టుకుంటున్న బంగ్లా కెప్టెన్‌ షకీబుల్‌ హసన్... మరోమారు భారత్‌కు కొరకాని కొయ్యగా మారే అవకాశముంది. అల్‌రౌండర్‌ మెహిది హసన్ సైతం భారత్‌ను ఇబ్బంది పెట్టే ఛాన్స్ ఉంది. తైజుల్‌ ఇస్లాం, తస్కిన్‌ అహ్మద్‌, ఖలీద్‌ అహ్మద్‌తో బంగ్లా బౌలింగ్ విభాగం బలంగా కనిపిస్తోంది.
