హెడ్డింగ్లీ వేదికగా ఇంగ్లాండ్తో జరుగుతోన్న మూడో టెస్టు మూడో రోజు భారత బ్యాట్స్మెన్ ఆకట్టుకున్నారు. తొలి ఇన్నింగ్స్లో కేవలం 78 పరుగులకే ఆలౌటైన కోహ్లీ సేన రెండో ఇన్నింగ్స్లో పుంజుకున్న తీరు అద్భుతం. ప్రస్తుతం రెండు వికెట్ల నష్టానికి 215 పరుగులతో ఉన్న టీమ్ఇండియా.. ఇంగ్లాండ్ ఆధిక్యానికి ఇంకా 139 పరుగులు వెనకబడి ఉంది. అయితే శుక్రవారం నాటి ఆటలో వేగంగా ఆడిన ఛెతేశ్వర్ పుజారా (Cheteshwar Pujara) బ్యాటింగే హైలైట్. ఇప్పుడు అభిమానులంతా అతడి ఇన్నింగ్స్ గురించే చర్చించుకుంటున్నారు.
432 పరుగులకు ఆలౌటైన రూట్ సేన భారత్ ముందు 354 పరుగుల తొలి ఇన్నింగ్స్ ఆధిక్యాన్ని ఉంచింది. దీంతో రెండో ఇన్నింగ్స్ మొదలుపెట్టిన టీమ్ఇండియా ఆచితూచి ఆడింది. అయినప్పటికీ 8 పరుగుల వ్యక్తిగత స్కోరు వద్ద రాహుల్ నిష్క్రమించాడు. అనంతరం క్రీజులోకి వచ్చిన నయావాల్ ఛెతేశ్వర్ పుజారా ధాటిగా ఇన్నింగ్స్ మొదలుపెట్టాడు. 50 స్ట్రైక్రేటుతో రన్స్ సాధించాడు. మొత్తంగా 91* పరుగులు చేస్తే అందులో బౌండరీల ద్వారానే 60 పరుగులు వచ్చాయి. అతడి కెరీర్లోనే తొలిసారిగా రోటీన్కు భిన్నంగా అతడి బ్యాటింగ్ చేశాడని చెప్పొచ్చు. గత కొద్దికాలంగా ఫామ్లేమితో సతమతమవుతున్న పుజారా తిరిగి గాడిలో పడటమే కాక వేగంగా పరుగులు చేయడం అభిమానుల ఆనందానికి కారణంగా మారింది.
"స్లోగా ఆడతూ స్ట్రైక్ రొటేట్ చేస్తాడు.. అతడు క్రీజులో ఉంటే మరో ఎండ్లో ఉన్న బ్యాట్స్మెన్ ధైర్యంగా బ్యాటింగ్ చేయొచ్చు" ఇవి పుజారా బ్యాటింగ్కు దిగితే క్రికెట్ విశ్లేషకులు, ప్రేక్షకుల నుంచి వినిపించే మాట. కెరీర్లో ఇప్పటివరకు 90 టెస్టు మ్యాచ్లాడిన పుజారా 6000 పరుగులు పూర్తి చేశాడు. కానీ, తాజాగా లీడ్స్ మ్యాచ్లో చాలా వేగంగా రన్స్ చేసి.. ఫాస్ట్గా ఆడే సత్తా తనలో ఉందని నిరూపించాడు నయావాల్.
ఇంతవరకూ చూడలేదు..
మూడో టెస్టులో పుజారా బ్యాటింగ్ తీరుపై టీమ్ఇండియా మాజీ పేసర్ ఆశిష్ నెహ్రా (Ashish Nehra) స్పందించాడు. అతడి బ్యాటింగ్ పూర్తిగా భిన్నంగా ఉందని తెలిపాడు. సానుకూల మనస్తత్వంతో క్రీజులో గడిపాడని పేర్కొన్నాడు.
"ఛెతేశ్వర్ పుజారా ఇంతకు ముందెప్పుడూ ఇంత వేగంగా బ్యాటింగ్ చేయలేదు. నేను చూసినంత వరకు అతడు చాలా నిదానంగా స్ట్రైక్ రొటేట్ చేస్తుంటాడు. లీడ్స్ టెస్టులో కొత్త పుజారాను మనం చూస్తున్నాం. అతడి బ్యాటింగ్కు సంబంధించి ఎలాంటి ఒత్తిడిలో ఉన్నట్లు కనిపించడం లేదు. అతడి సొంత ఆలోచన ప్రకారమే ఇలాంటి ఇన్నింగ్స్ ఆడుతున్నాడని నేను చెప్పగలను."
-ఆశిష్ నెహ్రా, టీమ్ఇండియా మాజీ క్రికెటర్.
ఇదీ చదవండి: England vs India: టెస్టుల్లో ఇంగ్లాండ్ జట్టు డకౌట్ల రికార్డు!
