భారత్, న్యూజిలాండ్ ప్రపంచకప్ మెగా టోర్నీని ఘనంగా ప్రారంభించాయి. ఈ ప్రపంచకప్లో ఇప్పటివరకు ఇరు జట్ల ప్రదర్శనపై ఓ లుక్కేద్దాం.
కివీస్ హ్యాట్రిక్ విజయాలతో జోరు మీద ఉంది. శ్రీలంక, బంగ్లాదేశ్, అఫ్గానిస్థాన్లపై గెలిచింది. ఇప్పుడు భారత్తో పోరుకు సిద్ధమైంది.
టీమిండియా ఏం తక్కువ కాదు. దక్షిణాఫ్రికా, ఆస్ట్రేలియాను ఓడించి టైటిల్ రేసులో ఉన్న బలమైన జట్టుగా నిరూపించుకుంది. కివీస్కు గట్టి పోటీ ఇచ్చేందుకు సిద్ధమైంది.
టోర్నీకి ముందు జరిగిన వామప్ మ్యాచ్లో భారత్ను చిత్తు చేసింది కివీస్. 179 పరుగులకే మనోళ్లు ఆలౌట్. భారత బౌలర్లు ఆ మ్యాచ్లో తేలిపోయారు. ఈ గెలుపు ఇచ్చిన ఆత్మవిశ్వాసంతో విలియమ్సన్ సేన బరిలోకి దిగుతోంది. వారిపై ప్రతీకారం తీర్చుకోవాలని భావిస్తోంది టీమిండియా.
3 విజయాలతో పాయింట్ల పట్టికలో న్యూజిలాండ్ అగ్రస్థానంలో కొనసాగుతోంది. భారత్ రెండు విజయాలతో ఇంగ్లాండ్తో సమంగా ఉన్నా... నెట్ రన్రేట్ ఆధారంగా మూడో స్థానంలో ఉంది.
రెండు ఫేవరేట్ జట్లు... భారీ అంచనాలు.... మరి ఏ జట్టు విజయావకాశాలు ఎలా ఉన్నాయి...? ప్రస్తుత టోర్నీలో అపజయమే ఎరుగని ఇరు జట్లలో ఓటమి ఎవరిని పలకరిస్తుంది..?
న్యూజిలాండ్
2015 ప్రపంచకప్లో అద్భుత ప్రదర్శన చేసింది న్యూజిలాండ్ జట్టు. ఆస్ట్రేలియా చేతిలో ఓడి రన్నరప్తో సరిపెట్టుకుంది. ఈ టోర్నీలోనూ ఫేవరేట్గా బరిలోకి దిగింది. న్యూజిలాండ్కు బ్యాటింగే బలం అనుకుంటే.. ఇప్పుడు బౌలర్లూ అద్భుత ప్రదర్శన చేస్తున్నారు.
- టాప్ ఆర్డర్ విషయానికొస్తే ఓపెనర్లు గప్తిల్, మన్రో చెలరేగి ఆడగలరు. తొలి మ్యాచ్లో శ్రీలంకపై 137 పరుగుల ఛేదనలో వికెట్లేమీ కోల్పోకుండా జట్టుకు విజయాన్ని సాధించిపెట్టారు. గప్తిల్ 73, మన్రో 58 పరుగులతో అజేయంగా నిలిచారు. తర్వాతి మ్యాచుల్లోనూ వీరిద్దరూ మోస్తరుగా బ్యాటింగ్ చేశారు.
- వన్డౌన్లో విలియమ్సన్, మిడిలార్డర్లో టేలర్ జట్టుకు వెన్నెముకగా నిలుస్తున్నారు. వీరిద్దరి భాగస్వామ్యాలు జట్టుకు విజయాన్ని అందిస్తున్నాయి. బంగ్లాపై టేలర్ 82, విలియమ్సన్ 40 పరుగులు సాధించారు. ఆఫ్గానిస్థాన్పై విలియమ్సన్ 79, టేలర్ 48 పరుగులతో విజయంలో కీలక పాత్ర పోషించారు.
టాప్ ఆర్డర్ ప్రదర్శనతో లోయర్ ఆర్డర్లో లాథమ్, నీషమ్లకు పెద్దగా బ్యాటింగ్ చేసే అవకాశం రావట్లేదు. బంగ్లాతో మ్యాచ్లో కీపర్ లాథమ్ డకౌటయ్యాడు. అవకాశం వస్తే ఈ ఇద్దరూ స్థాయికి తగ్గ ప్రదర్శన చేయగలిగిన వారే.
బౌలింగ్లో ట్రెంట్ బౌల్ట్, ఫెర్గూసన్, హెన్రీలతో పేస్ దళం బలంగా ఉంది. స్పిన్నర్ నీషమ్ ఎలాగూ ఉండనే ఉన్నాడు. శ్రీలంకపై ఫెర్గూసన్, హెన్రీ తలో 3 వికెట్లు తీశారు. బంగ్లాదేశ్పై హెన్రీ 4, అఫ్గాన్పై ఫెర్గూసన్ 4, నీషమ్ 5 వికెట్లతో చెలరేగారు.
టాప్-5 ఆటగాళ్లు...
| ఆటగాడు | మ్యాచ్లు | పరుగులు | వికెట్లు |
| గప్తిల్ | 3 | 98 | - |
| విలియమ్సన్ | 3 | 119 | - |
| టేలర్ | 3 | 130 | - |
| హెన్రీ | 3 | - | 7 |
| ఫెర్గూసన్ | 3 | - | 8 |
భారత్...
2011 ప్రపంచకప్ నెగ్గింది భారత్. ఈసారీ ఫేవరేట్గా బరిలోకి దిగింది. అంచనాలకు తగ్గట్లుగానే అద్భుత ప్రదర్శనలతో ఆకట్టుకుంటోంది. భారత్కు బ్యాటింగ్తో పాటూ అద్భుతమైన ప్రపంచస్థాయి బౌలింగ్ దళం ఉంది.
ఇప్పటివరకు భారత విజయాల్లో కీలక పాత్ర పోషించింది ఓపెనర్లే. సౌతాఫ్రికాపై రోహిత్ శర్మ, ఆస్ట్రేలియాపై ధావన్ శతకాలతో విజృంభించారు. విజయాలు తేలికయ్యాయి. వేలి గాయం కారణంగా ఇప్పుడు ధావన్ దూరమయ్యాడు. రోహిత్తో ఇన్నింగ్స్ను ప్రారంభించేది ఎవరో తేలాల్సి ఉంది. ఐసీసీ టోర్నీల్లో అద్భుతంగా రాణించే ధావన్ లేని లోటు టీమిండియా విజయావకాశాలనూ ప్రభావం చూపనుంది.
- రోహిత్ శర్మ మంచి ఫామ్లో ఉన్నాడు. అతడు కుదురుకుంటే ప్రత్యర్థి బౌలర్లలో వణుకు పుట్టించగలడు. ఆడిన 2 మ్యాచుల్లో 179 పరుగులతో రాణించాడు.
- మూడో స్థానంలో బ్యాటింగ్కు వచ్చే కోహ్లీ కూడా అత్యుత్తమ ఫామ్లో ఉన్నాడు. సౌతాఫ్రికాపై స్వల్ప స్కోరుకే వెనుదిరిగినా.. ఆస్ట్రేలియాపై మంచి ఇన్నింగ్స్ ఆడాడు. 77 బంతుల్లో 82 పరుగులతో సత్తా చాటాడు. మిడిలార్డర్ రాహుల్, ధోని, జాదవ్లతో బలంగా ఉంది.
- రాహుల్, జాదవ్కు ఇప్పటివరకు పెద్దగా బ్యాటింగ్ చేసే అవకాశాలు రాలేదు. ధోని.. కూడా దూకుడుగా ఆడుతూ.. మోస్తరు స్కోరుతో రాణిస్తున్నాడు.
లోయర్ ఆర్డర్లో హార్దిక్ పాండ్య చెలరేగుతున్నాడు. ఆస్ట్రేలియాతో మ్యాచ్లో నాలుగో స్థానంలో బ్యాటింగ్కు వచ్చి సిక్సర్లు, ఫోర్లతో విరుచుకుపడ్డాడీ దూకుడైన బ్యాట్స్మన్. 27 బంతుల్లోనే 48 పరుగులు చేసి భారత్ భారీ స్కోరు చేయడంలో కీలక పాత్ర పోషించాడు. ఇతను బౌలింగ్లోనూ రాణించగలడు.
భారత బౌలింగ్ దళం అత్యంత పటిష్ఠంగా ఉంది. బుమ్రా, భువనేశ్వర్, పాండ్య పేస్ విభాగాన్ని పంచుకోనున్నారు. చాహల్, కుల్దీప్లు స్పిన్నర్లుగా ఉన్నారు.
స్పిన్నర్ చాహల్ సౌతాఫ్రికాపై 4 వికెట్లతో చెలరేగి కట్టడి చేయగలిగాడు. ఆ మ్యాచ్లో బుమ్రా, భువీ రెండు వికెట్లతో రాణించారు.
ఆస్ట్రేలియాపై బుమ్రా, భువీ చెరో 3 వికెట్లు తీశారు. చాహల్ 2 వికెట్లతో ఆకట్టుకున్నాడు. కుల్దీప్ యాదవ్ అంచనాలకు తగ్గట్లుగా రాణించట్లేదు.
| ఆటగాడు | మ్యాచ్లు | పరుగులు | వికెట్లు |
| రోహిత్ శర్మ | 2 | 179 | - |
| విరాట్ కోహ్లీ | 2 | 100 | - |
| హార్దిక్ పాండ్య | 2 | 63 | - |
| బుమ్రా | 2 | - | 5 |
| చాహల్ | 2 | - | 6 |
ఇటీవలి కాలంలో న్యూజిలాండ్పై భారత్ రికార్డు మెరుగ్గా ఉంది. అయితే.. ప్రపంచకప్ టోర్నీల్లో మొత్తంగా కివీస్దే పైచేయి.
గత 8 వన్డేల్లో ఆరింట్లో విజయం సాధించింది భారత్. ఈ ఏడాది ప్రారంభంలో న్యూజిలాండ్పై వారి సొంతగడ్డపైనే 4-1తో సిరీస్ గెల్చుకుంది టీమిండియా.
కానీ.. ప్రపంచకప్లో కివీస్దే పైచేయి. మొత్తంగా ప్రపంచకప్ టోర్నీ ముఖాముఖిల్లో న్యూజిలాండ్ భారత్పై మెరుగ్గా ఉంది. ఇరు జట్లు 7 మ్యాచుల్లో తలపడగా.. కివీస్ 4, భారత్ 3 విజయాలతో ఉన్నాయి.
ముఖాముఖి
| భారత్ | న్యూజిలాండ్ | |
| 7 | మ్యాచ్లు | 7 |
| 3 | గెలుపు | 4 |
| 4 | ఓటమి | 3 |
| 0 | డ్రాగా ముగిసినవి | 0 |
| 0 | ఫలితం తేలనివి | 0 |
చివరగా భారత్-న్యూజిలాండ్ ఈ మెగాటోర్నీలో పోటీపడింది 2003 ప్రపంచకప్లోనే. సెంచూరియన్ వేదికగా జరిగిన ఆ మ్యాచ్లో భారత్ 7 వికెట్ల తేడాతో గెలిచింది. మొదటి ప్రపంచకప్ 75, 79, 92, 99 లలో కివీస్ చేతిలో పరాజయం పాలైంది భారత్. 1987 ప్రపంచకప్లో ఆ జట్టుతో తలపడిన రెండు మ్యాచుల్లోనూ భారత్నే విజయం వరించింది.
టీమ్ బలాబలాలే కాదు... వర్షం పడుతుందా అన్నదే అసలు ప్రశ్న. భారత్-కివీస్ మ్యాచ్కు వర్షం ముప్పు పొంచి ఉంది. నాటింగ్హామ్లో గురువారం వాన పడొచ్చని చెప్పింది వాతావరణ శాఖ. ఇదే జరిగితే.. మ్యాచ్ పూర్తిగా రద్దవుతుంది. లేదా ఓవర్లు కుదిస్తారు. చూద్దాం... ఏం జరుగుతుందో.
