ఇండియన్ ప్రీమియర్ లీగ్ (ఐపీఎల్) -2021 వేదిక గురించి భారత క్రికెట్ నియంత్రణ మండలి (బీసీసీఐ) తన వైఖరి తెలియజేసింది. ప్రస్తుతానికి భారత్ వెలుపల ప్రత్యామ్నాయ వేదిక కోసం చూడాల్సిన అవసరం లేదని సంస్థ భావిస్తోంది. కొవిడ్ వేళ గతేడాది లీగ్ను యూఏఈలో నిర్వహించగా.. ఈ సారి భారత్లోనే నిర్వహిస్తామని బీసీసీఐ కోశాధికారి అరుణ్ సింగ్ ధుమాల్ ధీమా వ్యక్తంచేశారు.
"ఐపీఎల్ను భారత్లోనే నిర్వహించేందుకు కృషి చేస్తున్నాం. అలా చేయగలమని నమ్మకంగా ఉన్నాం. అందుకే ప్రత్యామ్నాయ వేదిక గురించి ఆలోచించడం లేదు. ప్రస్తుతానికి యూఏఈ కన్నా భారతే భద్రమైనది. పరిస్థితులు మరింత మెరుగవుతాయని ఆశిస్తున్నాం" అని ధుమాల్ చెప్పారు. పరిస్థితులు అనుకూలిస్తే మైదానాల్లోకి 25-50 శాతం వరకు ప్రేక్షకులను అనుమతించడానికి ప్రయత్నిస్తున్నట్లు తెలిపారు.
ఇదీ చూడండి: ఐపీఎల్ 2021: మరోసారి టైటిల్ స్పాన్సర్గా వివో!
