కరోనా ప్రభావంతో ప్రపంచవ్యాప్తంగా పలు క్రీడాటోర్నీలు రద్దయ్యాయి. భారత్లోనూ ఈ వైరస్ వ్యాప్తి పెరుగుతుండటం వల్ల 21 రోజుల లాక్డౌన్ విధించారు. ఐపీఎల్తో సహా వివిధ పోటీలు వాయిదా పడ్డాయి. దీంతో స్థానిక మ్యాచ్ల్లో ఉండే అంపైర్లు, స్కోరర్లు ఉపాధిని కోల్పోయారు. ఇప్పుడు వీరిని ఆదుకునేందుకు ముందుకు వచ్చారు బీసీసీఐ మాజీ అంపైర్, ముంబయి క్రికెట్ అసోసియేషన్ మాజీ సభ్యుడు గణేశ్ అయ్యర్. తన మిత్రులతో కలిసి 'లెండింగ్ హ్యాండ్' పేరుతో ఓ సంస్థను స్థాపించారు. అనంతరం ఈ విషయంపై మాట్లాడారు.
"మ్యాచ్లు రద్దు కావడం వల్ల ఆర్థికంగా ఇబ్బందులు పడుతున్న వారిని గుర్తించాం. సభ్యులు విరాళాలిచ్చిన మొత్తం కలిపి రూ.2.5 లక్షలు పోగైంది. ముంబయి క్రికెట్ అసోసియేషన్, అపెక్స్ కౌన్సిల్ సభ్యులు.. తమ ఉదారత చాటుకున్నారు. ఇప్పటివరకు 47 మంది అంపైర్లు, 15 మంది స్కోరర్లు ఉన్నారని గుర్తించాం. సహాయంగా తొలుత రూ.3 వేలు చొప్పున వారి బ్యాంక్ ఖాతాల్లో వేయనున్నాం. మిగతా అవసరాల్ని మరో వారం- పది రోజుల్లో తీరుస్తాం" -గణేశ్ అయ్యర్, ముంబయి క్రికెట్ అసోసియేషన్ మాజీ సభ్యుడు
ముంబయి క్రికెట్ అసోసియేషన్ నిర్వహించే టోర్నీల్లో అంపైర్లుగా పనిచేసేవారికి రోజుకు రూ.2 వేలు, స్కోరర్లకు రూ.1500 వేతనంగా చెల్లిస్తారని ఎంసీఏ అధికారి ఒకరు చెప్పారు. ఇప్పుడు మ్యాచ్లు జరగకపోవడం వల్ల వారికి రాబడి లేకుండా పోయింది.
