ఐపీఎల్లో బరిలో దిగే ఇంగ్లాండ్, ఆస్ట్రేలియా ఆటగాళ్లను త్వరగా.. సురక్షితంగా యూఏఈకి రప్పించేందుకు ఏడు ఫ్రాంచైజీలు ఏకమయ్యాయి. 22 మంది ఆటగాళ్లను మాంచెస్టర్ నుంచి దుబాయ్ తీసుకొచ్చేందుకు ఏడు ఫ్రాంఛైజీలు కలిసి రూ.కోటి ఖర్చుతో ప్రత్యేక విమానాన్ని బుక్ చేశాయి. ముంబయి ఇండియన్స్ మినహా మిగతా జట్టు యాజమాన్యాలు తమ విదేశీ ఆటగాళ్ల ప్రయాణం కోసం అన్ని జాగ్రత్తలు తీసుకోనున్నాయి. శానిటైజ్ చేసిన బస్సులో మాంచెస్టర్లోని స్టేడియం నుంచి విమానశ్రయానికి ఆటగాళ్లను తీసుకొస్తారు. ఇంగ్లాండ్ బయో బబుల్లో విధులు నిర్వర్తిస్తున్న డ్రైవర్ బస్సు నడిపిస్తాడు. ఇమిగ్రేషన్లోనూ ఆటగాళ్లను ఎక్కువసేపు ఆపరు. ప్రత్యేక విమానాన్ని కూడా శానిటైజ్ చేస్తారు.
దుబాయ్ అంతర్జాతీయ విమానాశ్రయంలో కాకుండా వేరే చోట విమానాన్ని దింపుతారు. అనంతరం ఆయా ఫ్రాంచైజీలు తమ ఆటగాళ్లను ప్రత్యేక వాహనాల్లో తీసుకెళ్తాయి. ఆటగాళ్లను ఒక బయో బబుల్ నుంచి ఇంకో బబుల్లోకి తీసుకురావడం ద్వారా ఆరు రోజుల క్వారంటైన్ సమయం తప్పుతుందని ఫ్రాంచైజీలు భావిస్తున్నాయి. అయితే క్వారంటైన్ విషయంలో రాజీపడేది లేదని బీసీసీఐ అధికారి వెల్లడించారు.
