ఆస్ట్రేలియా పర్యటనలో రోహిత్ శర్మ, ఇషాంత్ శర్మ పాల్గొంటారా లేదా అనే విషయమై ఆందోళన వ్యక్తం చేశాడు టీమ్ఇండియా హెడ్ కోచ్ రవిశాస్త్రి. మరో మూడు లేదా నాలుగు రోజుల్లో వారు భారత్ నుంచి బయలుదేరితేనే ఆసీస్తో జరిగే టెస్టు సిరీస్లో పాల్గొనడానికి అవకాశముంటుందని చెప్పాడు. లేదంటే వారు ఆడటం ఇక కష్టమేనని అభిప్రాయపడ్డాడు. ప్రస్తుతం ఎన్సీఏకు చెందిన వైద్యబృందం వారిని పర్యవేక్షిస్తూ.. ఇంకా ఎంత కాలం విశాంత్రి అవసరమో అంచనా వేస్తోందని తెలిపాడు.
ఐపీఎల్లో గాయపడ్డ రోహిత్, ఇషాంత్.. ప్రస్తుతం బెంగళూరులోని ఎన్సీఏలో పునరావాసానికి వెళ్లారు. అక్కడ పూర్తిస్థాయి ఫిట్నెస్ సాధిస్తేనే ఆసీస్తో జరిగే టెస్ట్ సిరీస్లో ఆడటానికి అర్హత సాధిస్తారు. అయితే వారు ప్రాక్టీస్ చేస్తోన్న వీడియోలను బీసీసీఐ పోస్ట్ చేస్తుంది తప్ప.. వారి పర్యటన గురించి ఇంకా ఎటువంటి ప్రకటన చేయలేదు. ఆస్ట్రేలియా నిబంధనల ప్రకారం సిరీస్లో పాల్గొనే ఆటగాళ్లు అక్కడికి చేరుకోగానే 14రోజుల పాటు క్వారంటైన్లో ఉండాలి. అడిలైడ్ వేదికగా డిసెంబర్‌ 17 నుంచి తొలి టెస్ట్ ప్రారంభంకానుంది. కాబట్టి వారు త్వరగా కోలుకోని అక్కడికి చేరుకోగానే నిర్బంధంలోకి వెళ్లాల్సి ఉంటుంది. అప్పుడే ఇరువురూ టెస్ట్ సిరీస్కు హాజరుకాగలరు. కానీ ఇప్పటివరకు వారి ఆరోగ్యపరిస్థితిపై ఎటువంటి స్పష్టత లేకపోవడం వల్ల రవిశాస్త్రి పైవ్యాఖ్యలు చేశాడు.
అయితే ఇటీవల ఓ ఇంటర్వ్యూలో పాల్గొన్న రోహిత్.. తాను టెస్టు సిరీస్లో ఆడుతానని ధీమా వ్యక్తం చేశాడు. ప్రస్తుతం గాయం నుంచి తాను కోలుకుంటున్నట్లు తెలిపాడు. నవంబరు 17 నుంచి జనవరి 19వరకు జరగనున్న పర్యటనలో ఇరు జట్లు మూడు వన్డేలు, మూడు టీ20లు, నాలుగు టెస్టులు ఆడనున్నాయి.
కోహ్లీ నిర్ణయం సరైనదే
ఆసీస్-భారత్కు మధ్య జరిగే టెస్టు సిరీస్ సమయంలో సారథి కోహ్లీ భార్య బిడ్డకు జన్మనివ్వనుంది. ఇందుకోసం విరాట్.. టెస్ట్ సిరీస్లోని చివరి మూడు మ్యాచ్లు ఆడకుండా పితృత్వ సెలవుల తీసుకుని స్వదేశానికి రానున్నాడు. దీనిపై స్పందించిన రవిశాస్త్రి.."కోహ్లీ సరైన నిర్ణయమే తీసుకున్నాడు. ఆ క్షణాలు మళ్లీ మళ్లీ తిరిగి వచ్చేవి కాదు. అతడు తన భార్య వద్దకు వెళ్తున్నందుకు నేను సంతోషంగా ఉన్నాను. గత ఆరేళ్ల నుంచి టీమ్ఇండియా విజయాలలో విరాట్ కీలక పాత్ర పోషించాడు. కాబట్టి అతడు దూరమవ్వడం కొంచెం కష్టంగా అనిపిస్తుంది. కానీ విరాట్ స్థానంలో మరో ఆటగాడికి అవకాశం లభిస్తుంది" అని అన్నాడు.
ఇదీ చూడండి : కోలుకుంటున్నా.. ఆసీస్తో టెస్టులు ఆడతా: రోహిత్
