రోడ్ సేఫ్టీ సిరీస్ సెమీఫైనల్లో ఇండియా లెజెండ్స్ విజయం సాధించింది. ఉత్కంఠభరితంగా సాగిన మ్యాచ్లో విండీస్ లెజెండ్స్పై భారత బ్యాటింగ్ దిగ్గజం సచిన్ తెందుల్కర్ సేన.. 12 పరుగుల తేడాతో గెలుపొందింది. ఫలితంగా ఫైనల్కు చేరింది. తొలుత బ్యాటింగ్ చేసిన భారత లెజెండ్స్ జట్టు నిర్ణీత ఓవర్లలో 3 వికెట్ల నష్టానికి 218 పరుగులు చేసింది. అయితే 219 పరుగుల లక్ష్యంతో బరిలోకి దిగిన లారా సేన 20 ఓవర్లలో ఆరు వికెట్లు కోల్పోయి 206 పరుగులకు పరిమితమైంది.
సచిన్ తెందుల్కర్ (42 బంతుల్లో 65) అర్ధ సెంచరీతో ఆకట్టుకోగా.. సెహ్వాగ్ (17 బంతుల్లో 35), యూసుఫ్ పఠాన్ (20 బంతుల్లో 37*), యువరాజ్ (20 బంతుల్లో 49*) విధ్వంసం సృష్టించారు. బ్యాటింగ్ చేసిన ప్రతి భారత ఆటగాడు మెరుగైన ప్రదర్శన చేశారు. విండీస్ బౌలర్లలో టినో బెస్ట్ 2 వికెట్లు తీసుకున్నాడు.
219 పరుగుల భారీ లక్ష్యంతో బరిలోకి దిగిన లారా సేన 20 ఓవర్లలో 6 వికెట్ల నష్టానికి 206 పరుగులకే పరిమితమైంది. డ్వేన్ స్మిత్ (36 బంతుల్లో 63), డియో నరైన్ (44 బంతుల్లో 59) పరుగులతో రాణించినప్పటికీ విండీస్కు ఓటమి తప్పలేదు.
భారత బౌలర్లలో వినయ్ కుమార్ రెండు వికెట్లు తీయగా.. ప్రజ్ఞాన్ ఓజా, ఇర్ఫాన్ తలో వికెట్ తీశారు.
