ఇటీవలే ప్రపంచకప్ గెలుచుకుంది ఇంగ్లాండ్. త్వరలో ఆస్ట్రేలియాతో యాషెస్ టెస్ట్ సిరీస్ ఆడనుంది. ఈ సమయంలో స్పందించాడు ఆస్ట్రేలియా జట్టు సహాయ కోచ్ రికీ పాంటింగ్. ప్రత్యర్థి జట్టులోని ఆల్రౌండర్ బెన్ స్టోక్స్ కీలకమైన ఆటగాడని అన్నాడీ ఆసీస్ మాజీ క్రికెటర్. అతడ్ని మాజీ ఇంగ్లీష్ క్రికెటర్ ఆండ్రూ ఫ్లింటాఫ్తో పోల్చాడు.
"బెన్ స్టోక్స్ ఇప్పుడు ఆటలో పరిణితి కనబరుస్తున్నాడు. ఇంతకు ముందులా కాకుండా క్లాస్గా ఆడుతున్నాడు. ప్రపంచకప్లో పరిస్థితులను అర్థం చేసుకుని, జట్టుకు ఏం కావాలో తెలుసుకుని అందుకు తగ్గట్లుగా ఆడాడు. ప్రస్తుతం ఇంగ్లాండ్ జట్టులో అతడు కీలక ఆటగాడు. మాజీ ఆల్రౌండర్ ఫ్లింటాఫ్లా కనిపిస్తున్నాడు. స్టోక్స్ను అడ్డుకునేందుకు మేం ప్రణాళికలు రచిస్తున్నాం" -రికీ పాంటింగ్, ఆస్ట్రేలియా సహాయ కోచ్
2017 బ్రిస్టల్లో జరిగిన గొడవ కారణంగా కొన్ని నెలల పాటు ఇబ్బందులు ఎదుర్కొన్నాడు బెన్ స్టోక్స్. ఆ తర్వాత ఆటపై దృష్టి పెట్టి కీలక ఆటగాడిగా ఎదిగాడు. ప్రపంచకప్లో తన వంతు పాత్ర పోషించి.. ఇంగ్లీష్ జట్టు తొలిసారి కప్పు గెలుచుకోవడంలో సహాయపడ్డాడు.
ఇంగ్లాండ్ వేదికగా ప్రఖ్యాత యాషెస్ సిరీస్ ఆగస్టు 1 నుంచి ప్రారంభం కానుంది. విజయం సాధించేందుకు ఇరుజట్లు తీవ్ర కసరత్తులు చేస్తున్నాయి.
