ఇకపై అంతర్జాతీయ క్రికెట్ ఆడాలంటే కనీసం 15 ఏళ్లు ఉండాల్సిందే. ఈ మేరకు అంతర్జాతీయ క్రికెట్ మండలి నిర్ణయం తీసుకుంది. ఐసీసీ ఈవెంట్లు, ద్వైపాక్షిక సిరీస్ల్లో ఆడే ప్రతి ఆటగాడికి 15 ఏళ్లు దాటి ఉండాలని ఓ ప్రకటనలో తెలియజేసింది.
"ఐసీసీ ఈవెంట్స్, ద్వైపాక్షిక క్రికెట్, అండర్-19 టోర్నీలతో సహా క్రికెట్కు సంబంధించిన అన్ని మ్యాచ్ల్లో ఆటగాళ్లకు కనీస వయోపరిమితులను ప్రవేశపెట్టేందుకు బోర్డు ధ్రువీకరించింది. పురుషుల, మహిళల లేదా అండర్-19 స్థాయిలో ఆడే ప్రతి క్రికెటర్ తప్పకుండా 15 ఏళ్లు నిండి ఉండాలి. ఒకవేళ అంతకంటే తక్కువ ఉంటే జాతీయ జట్టులో ఆడించేందుకు ఆ దేశ బోర్డు తప్పనిసరిగా ఐసీసీ నుంచి అనుమతి తీసుకోవాల్సి ఉంటుంది"
- అంతర్జాతీయ క్రికెట్ మండలి (ఐసీసీ)
ఇంతకు ముందు వరకు అంతర్జాతీయ క్రికెట్లో కనీస వయోపరిమితి లేదు. 1996 నుంచి 2005 మధ్య పాకిస్థాన్ జట్టు తరపున 7 టెస్టులు, 16 వన్డేలు ఆడిన హసన్ రాజా అంతర్జాతీయ క్రికెట్లో అతిపిన్న వయస్కుడిగా రికార్డు సాధించాడు. 14 సంవత్సరాల 227 రోజుల వయసులోనే టెస్టుల్లో అరంగేట్రం చేశాడు.
దిగ్గజ బ్యాట్స్మన్ సచిన్ తెందుల్కర్ టీమ్ఇండియా తరపున చిన్న వయసులోనే టెస్టు క్రికెట్లో అడుగుపెట్టాడు. 16 ఏళ్ల 205 రోజుల వయసులో అరంగేట్రం చేశాడు. సచిన్ టెస్టుల్లో 15,921, వన్డేల్లో 18,426 పరుగులు చేశాడు.
