కరోనా సోకిన 10 మంది జట్టు సభ్యుల(9మంది క్రికెటర్లు, సహాయ సిబ్బందిలోని ఓ వ్యక్తి) పట్ల పాకిస్థాన్ క్రికెట్ బోర్డు, నిర్లక్ష్య ధోరణి వ్యవహరిస్తోందని ఆ దేశ మాజీ ఛీప్ సెలక్టర్ ఇంజమామ్ ఉల్ హక్ ఆరోపించాడు. జట్టు వైద్య బృందం కూడా పట్టిపట్టనట్లు ఉందని మండిపడ్డాడు. ఇలా ఉండటం సమంజసం కాదని ఆగ్రహం వ్యక్తం చేశాడు. వైరస్ సోకిన ఆటగాళ్లకు నాణ్యమైన చికిత్సను అందించి, క్లిష్ట పరిస్థితులో అండగా నిలవాల్సిన బాధ్యత బోర్డుకు ఉందని అభిప్రాయపడ్డాడు. ఈ విషయాల్ని తన యూట్యూబ్ ఛానెల్లో వెల్లడించాడు.
"ప్రస్తుత పరిస్థితుల్లో కరోనా సోకిన పాక్ క్రికెటర్లకు బోర్డు నుంచి ఎలాంటి మద్దతు లభించట్లేదు. కనీసం వారిని పట్టించుకోవడం లేదు. వైద్య బృందం అలానే వ్యవహరిస్తోంది. వైరస్ సోకిన ఆటగాళ్లు.. సూచనలు, సలహాలు కోసం వైద్యుల్ని సంప్రదించడానికి కాల్స్ చేస్తుంటే కనీసం వారు ఎత్తట్లేదని తెలిసింది. దయచేసి పీసీబీ ఆ ఆటగాళ్లకు అండగా నిలవాలని కోరుకుంటున్నాను"
-ఇంజుమాన్ ఉల్ హక్, పాక్ మాజీ క్రికెటర్.
జులై 13 నుంచి ఇంగ్లాండ్, పాక్ మధ్య ద్వైపాక్షిక సిరీస్ జరగాల్సి ఉంది. ఈ నేపథ్యంలో ఇంగ్లాండ్ పర్యటనకు వెళ్లేముందు పాకిస్థాన్ ఆటగాళ్లకు చేసిన వైద్యపరీక్షల్లో.. సదరు క్రికెటర్లకు కరోనా ఉన్నట్లు తేలింది. వీరిలో ఫకర్ జమాన్, ఇమ్రాన్ ఖాన్, కాషిఫ్ భట్టి, మహ్మద్ హఫీజ్, మహ్మద్ హస్నెయిన్, మహ్మద్ రిజ్వాన్, వాహబ్ రియాజ్ సహా పలువురు ఉన్నారు.
ఇది చూడండి : 2023 ప్రపంచకప్ కోసం అప్పుడే ప్లాన్ వేశాడు!
