టీమిండియా మాజీ సారథి మహేంద్రసింగ్‌ ధోనీకి భారత్‌లో ఎంత ఫాలోయింగ్‌ ఉందో ప్రత్యేకంగా చెప్పనక్కర్లేదు. ఈ స్టార్ క్రికెటర్ ఆటకు దూరమై దాదాపు 8 నెలలైనా అతడి పునరాగమనం కోసం ఎంతో ఆతృతగా ఎదురుచూస్తున్నారు అభిమానులు. మరోవైపు ధోనీపై అభిమానం దేశం దాటి పొరుగు దేశానికి చేరింది. చిరకాల ప్రత్యర్థి పాకిస్థాన్‌లోనూ మహీకి అభిమానులున్నారని తెలుసు. అయితే, ఆ అభిమానాన్ని మరింత ప్రత్యేకంగా, వినూత్నంగా చాటుకున్నాడు ఓ వ్యక్తి.
ప్రస్తుతం దాయాది దేశంలో పాకిస్థాన్ సూపర్ లీగ్(పీఎస్ఎల్) ఐదో సీజన్‌ జరుగుతోంది. ఇందులో ఇస్లామాబాద్‌ యునైటెడ్‌ ఇటీవల ముల్తాన్‌ సుల్తాన్‌తో తలపడింది. ఆ మ్యాచ్‌ చూడడానికి వచ్చిన ఇస్లామాబాద్‌ అభిమాని ఒకడు.. పాకిస్థాన్ జట్టు జెర్సీని ధరించాడు. దానిపై ధోనీ పేరుతో సహా అతడి నంబర్ 7 ఉండటం విశేషం. మ్యాచ్‌ జరుగుతుండగా అతడు ప్రత్యేక ఆకర్షణగా నిలిచాడు.
మరోవైపు ధోనీ క్రికెట్‌లో పునరాగమనం చేసేందుకు సిద్ధమయ్యాడు. ఈనెల 29 నుంచి జరగబోయే ఐపీఎల్‌ కోసం ప్రస్తుతం సన్నాహాల్లో ఉన్నాడు. ఇప్పటికే చెన్నై చేరుకున్న సీఎస్కే సారథి.. చెపాక్‌లో సాధన మొదలెట్టాడు. ముంబయి ఇండియన్స్‌తో ఆరంభ మ్యాచ్‌లో ధోనీ బరిలోకి దిగే అవకాశముంది. ఈ లీగ్ ప్రదర్శనతోనే ఇతడు ఈ ఏడాది ప్రపంచకప్లో చోటు దక్కించుకునేది లేనిది తేలనుంది.
