ప్రపంచమంతా కరోనాపై పోరాడుతున్న పరిస్థితుల్లో ఐపీఎల్ను శ్రీలంకలో నిర్వహించాలనే ప్రతిపాదనపై చర్చించడం అర్థంలేని విషయమని బీసీసీఐ సీనియర్ అధికారి అన్నారు. కరోనా మహమ్మారి విజృంభణ కారణంగా ఇండియన్ ప్రీమియర్ లీగ్ (ఐపీఎల్) 13వ సీజన్ నిరవధిక వాయిదా పడింది. అయితే ఈ లీగ్ను నిర్వహించడానికి తాము సిద్ధంగా ఉన్నట్లు శ్రీలంక క్రికెట్ బోర్డు అధ్యక్షుడు షమ్మీ సిల్వ తాజాగా ప్రకటించారు. దీనిపై బీసీసీఐ సీనియర్ అధికారి స్పందించారు.
"ప్రపంచమంతా కరోనాపై పోరాడుతున్న సమయంలో ఇలాంటి వాటిపై చర్చించలేం. శ్రీలంక క్రికెట్ బోర్డు నుంచి దీనిపై ఇంకా అధికార ప్రతిపాదన రాలేదు. ఒకవేళ టోర్నీ నిర్వహించాలనుకుంటే శ్రీలంకలోనే కాకుండా మరికొన్ని దేశాలు ఆతిథ్యం ఇవ్వటానికి సిద్ధంగా ఉంటాయి."
-బీసీసీఐ సీనియర్ అధికారి
ఐపీఎల్-2020 వాయిదా పడటం ఇది రెండోసారి. మార్చి 29న ప్రారంభం కావాల్సిన ఈ టోర్నీని మొదట ఏప్రిల్ 15కు వాయిదా వేశారు. కానీ కరోనా ప్రభావం దృష్టిలో ఉంచుకుని లాక్డౌన్ను రెండోసారి పొడిగించిన నేపథ్యంలో.. మరోసారి ఈ మెగాటోర్నీ నిరవధిక వాయిదా పడింది. పరిస్థితులు మెరుగయ్యాక లీగ్ నిర్వహణపై ఓ స్పష్టత ఇస్తామని ఇప్పటికే బీసీసీఐ తెలిపింది.
ఇదీ చూడండి.. ఐపీఎల్ నిర్వహణకు శ్రీలంక క్రికెట్ బోర్డు ఆసక్తి
