2011 ప్రపంచకప్ ఫైనల్లో ధోనీ కొట్టిన విన్నింగ్ సిక్స్‌ క్రికెట్ ప్రేమికుల మదిలో చిరకాలం నిలిచి ఉంటుంది. ఎన్నో ఏళ్ల సుదీర్ఘ నిరీక్షణ అనంతరం దేశానికి ప్రపంచకప్ అందించిన షాట్ అది. అందుకే ఆ గెలుపు జ్ఞాపకాలను మరింత పదిలం చేసేందుకు ముంబయి క్రికెట్ అసోసియేషన్‌ (ఎంసీఏ) సన్నాహాలు చేస్తోంది. అంతర్జాతీయ క్రికెట్కు ధోనీ వీడ్కోలు పలికిన నేపథ్యంలో.. భారత క్రికెట్కు అతడు చేసిన సేవలకు గుర్తింపుగా మహీ పేరిట సీటు ఏర్పాటు చేయనుంది.
వాంఖడే స్టేడియంలో ఆ బాల్ పడిన సీట్‌తో పాటు ప్రాంతాన్ని అందంగా అంకరించాలనుకుంటోంది. ఎంసీఏ అపెక్స్ కౌన్సిల్ సభ్యుడు ఆజింక్య నాయక్ ఈ విషయాన్ని ప్రస్తావిస్తూ ఎంసీఏకు ఓ లేఖ రాశారు. భారత క్రికెట్కు ధోనీ చేసిన అపారమైన సేవలకు కృతజ్ఞతగా బాల్ పడిన సీట్‌ను ధోనీకి అంకితమివ్వాల్సిందిగా కోరారు.
"వాంఖడే స్టేడియంతో ధోనీకి ఉన్న బంధాన్ని తెలియజేస్తూ అతడు కొట్టిన ప్రపంచకప్ విన్నింగ్ సిక్స్‌ జ్ఞాపకాలను పదిలం చేయాలనుకుంటున్నాం. ఆ బాల్ పడిన ప్రాంతాన్ని గుర్తించి ఆ సీట్‌ను పెయింట్ వేసి అందంగా అలంకరిస్తాం. ఆ ప్రాంతాన్ని పర్యాటక ఆకర్షణగా తీర్చిదిద్దాలనుకుంటున్నాం"
-- ఆజింక్య నాయక్, ఎంసీఏ అపెక్స్ కౌన్సిల్ సభ్యుడు.
"భారత క్రికెట్కు అతడు అందించిన అపారమైన సేవలకు గాను ఆ సీట్‌కు ధోనీ పేరు పెట్టి అతడికి అంకితం ఇవ్వాలనుకుంటున్నాం. భారతీయ క్రికెట్ చరిత్రలోనే అత్యద్భుతమైన ఆ క్షణాలను అభిమానుల గుండెల్లో చిరస్థాయిగా ఉంచాలనుకుంటున్నాం" అని నాయక్ లేఖలో స్పష్టం చేశారు.
అరుదైన గౌరవం.. భారత్లో తొలిసారి
భారత్లో సాధారణంగా క్రికెటర్ల పేరున స్టేడియంలో స్టాండ్స్ ఏర్పాటు చేస్తుంటారు. ఇలా సీట్లు ఏర్పాటు చేయడం మనదేశంలో తొలిసారి. అయితే ఆస్ట్రేలియా, న్యూజిలాండ్లో సాధారణమే. 2015 ప్రపంచకప్లో డేల్ స్టెయిన్ బౌలింగ్లో భారీ సిక్సర్ కొట్టి గ్రాంట్ ఇలియట్ న్యూజిలాండ్ను ఫైనల్ చేర్చాడు. అతడి గౌరవార్థం ఆ బంతి ఎక్కడైతే పడిందో ఆ కుర్చీని ఇలియట్ పేరిట ఏర్పాటు చేశారు.
- " class="align-text-top noRightClick twitterSection" data="">
