ప్రపంచకప్ ముగిసి ఐదునెలలు దాటింది.. మహేంద్ర సింగ్ ధోనీని మైదానంలో చూసి అంత కాలమే అయింది. ఎప్పుడొస్తాడు ధోనీ? అందరిలోనూ మెదులుతున్న ప్రశ్న ఇదే. ఈ ఎదురుచూపులకు త్వరలో సమాధానం దొరకనుంది. వచ్చే ఏడాది మార్చిలో మహీ.. మైదానంలో కనిపించే అవకాశముంది. ఇందుకోసం బంగ్లాదేశ్ క్రికెట్ బోర్డు(బీసీబీ).. బీసీసీఐ అనుమతి కోరింది.
ఆసియా ఎలెవన్ - రెస్ట్ ఆఫ్ ద వరల్డ్ మధ్య వచ్చే ఏడాది మార్చి 18 నుంచి 21 వరకు రెండు టీ20లు నిర్వహించనుంది ఐసీసీ. ఆసియా జట్టులో భారత్ నుంచి ఏడుగురు క్రికెటర్లు ఎంపికయ్యారు. ఇందులో మహేంద్రసింగ్ ధోనీ ఉన్నాడు. ఈ మ్యాచ్లకు బంగ్లాదేశ్ ఆతిథ్యమివ్వనుంది.
"ఆసియా ఎలెవన్ - రెస్ట్ ఆఫ్ ద వరల్డ్ జట్లకు మధ్య జరగబోయే రెండు టీ20లకు బంగ్లాదేశ్ ఆతిథ్యమివ్వనుంది. ఈ మ్యాచ్ల్లో క్రికెటర్లు పాల్గొనేందుకు బీసీసీఐతో పాటు ఇతర దేశాల క్రికెట్ బోర్డులను సంప్రదించాం" -నిజాముద్దీన్ చౌదరి, బీసీబీ చీఫ్ ఎగ్జిక్యూటివ్.
మహీతో పాటు విరాట్ కోహ్లీ, రోహిత్ శర్మ, జస్ప్రీత్ బుమ్రా, హార్దిక్ పాండ్య, భువనేశ్వర్ కుమార్, రవీంద్ర జడేజా.. ఆసియా ఎలెవన్ జట్టులో చోటు దక్కించుకున్నారు.
న్యూజిలాండ్తో జరిగిన ప్రపంచకప్ సెమీఫైనల్లో మహీ చివరగా ఆడాడు. ఆ టోర్నీ ముగిసిన తర్వాత పారా మిలటరీ దళంతో కలిసి పనిచేశాడు. అనంతరం వెస్టిండీస్, దక్షిణాఫ్రికా, బంగ్లాదేశ్ సిరీస్లకు దూరంగా ఉన్నాడు. ఇప్పుడు బంగ్లా నిర్వహిస్తున్న ఈ మ్యాచ్ల్లో ధోనీ ఆడేందుకు బీసీసీఐ అనుమతిస్తే మహీని మళ్లీ మైదానంలో చూడొచ్చు.
ఇదీ చదవండి: బీసీసీఐ రాజ్యంగ సవరణ వల్ల దాదాకే ప్రయోజనం!
