ఎలాంటి సవాళ్లు ఎదుర్కొనేందుకైనా సిద్ధమని.. అవకాశమొస్తే టెస్టుల్లో భారత జట్టుకు ఓపెనింగ్ చేయడానికైనా ఓకే అని యువ ఆల్రౌండర్ వాషింగ్టన్ సుందర్ తెలిపాడు. ఈ విషయంలో.. డ్రెస్సింగ్ రూమ్లో కోచ్ రవిశాస్త్రి పంచుకునే అనుభవాలు తనకు స్ఫూర్తిగా నిలుస్తాయని పేర్కొన్నాడు.
అండర్-19 జట్టుకు ఆడేటప్పుడు వాషింగ్టన్ టాప్ ఆర్డర్ స్పెషలిస్ట్ బ్యాట్స్మన్. అయితే ఆ తర్వాత ఫుల్టైమ్ ఆఫ్ స్పిన్నర్గా మారిపోయాడు. భారత టీ-20 జట్టులో అతని ఎంపికకు అదే ఉపయోగపడింది.
కోచ్ రవిశాస్త్రి.. భారత జట్టుకు ఆడే రోజుల్లో అతడి అనుభవాలను మాతో పంచుకునేవాడు. ఆ విషయాలన్నీ ఎంతో స్ఫూర్తిదాయకంగా ఉండేవి. అరంగ్రేటంలో స్పెషలిస్టు స్పిన్నర్గా కెరీర్ను ఆరంభించిన ఆయన.. న్యూజిలాండ్తో మ్యాచ్లో 4 వికెట్లు తీసి, పదో స్థానంలో బ్యాటింగ్ చేసినట్లు చెప్పాడు. తర్వాతి రోజుల్లో ఓపెనర్గా మారాడు. ప్రపంచంలోనే ఫాస్టెస్ట్ బౌలర్లను ఎదుర్కొన్నాడు. అలాంటి సవాళ్లను ఎదుర్కొనేందుకు నేను సిద్ధం. టెస్టుల్లో ఓపెనింగ్ బ్యాటింగ్ చేయాలంటే నాకెంతో ఇష్టం.
-వాషింగ్టన్ సుందర్, భారత బౌలర్.
ఫస్ట్ క్లాస్ క్రికెట్లో సుందర్కు 32 బ్యాంటింగ్ సగటు ఉండటం విశేషం.
డ్రెస్సింగ్ రూమ్లోనూ చాలా మంది రోల్ మోడల్స్ ఉన్నట్లు వాషింగ్టన్ పేర్కొన్నాడు. విరాట్, రోహిత్, రహానే, అశ్విన్ వంటి ఆటగాళ్లు సలహాలు, సూచనలు ఇవ్వడానికి ఎల్లప్పుడూ సిద్ధంగా ఉంటారని తెలిపాడు.
వాషింగ్టన్ సుందర్.. ఆస్ట్రేలియా పర్యటనలో టెస్టు సిరీస్ విజయంలో కీలక పాత్ర పోషించాడు. అటు బ్యాటుతోనూ, ఇటు బంతితోనూ రాణించాడు.
ఇదీ చదవండి: వారంలోనే రెండో 'థాయ్' టైటిల్ గెలిచిన కరోలినా
