కరోనా కారణంగా అక్టోబర్-నవంబర్లో జరగాల్సిన టీ20 ప్రపంచకప్ వచ్చే ఏడాదికి వాయిదా పడింది. ఫలితంగా ఆ సమయంలో ఇండియన్ ప్రీమియర్ లీగ్ నిర్వహించేందుకు మార్గం సుగమమైంది. అయితే భారత్లో కరోనా విజృంభణ తగ్గుముఖం పట్టకపోవడం వల్ల ఈ టోర్నీని విదేశాల్లో నిర్వహించాలని బీసీసీఐ భావించింది. తాజాగా ఈ విషయమై స్పష్టతనిచ్చారు ఐపీఎల్ పాలకమండలి ఛైర్మన్ బ్రిజేష్ పటేల్.
"ఐపీఎల్ను యూఏఈలో నిర్వహించాలని ఆలోచిస్తున్నాం. అందుకోసం ప్రభుత్వ అనుమతి కూడా కోరాం. త్వరలో జరగబోయే పాలకమండలి సమావేశంలో దీనిపై ఓ స్పష్టత వస్తుంది."
-బ్రిజేష్ పటేల్, ఐపీఎల్ పాలకమండలి ఛైర్మన్
ఇప్పటికే ఈ లీగ్ కోసం ఆటగాళ్లతో పాటు అభిమానులు ఆత్రుతగా ఎదురుచూస్తున్నారు. ఫ్రాంచైజీలు కూడా తమ ఏర్పాట్లను ప్రారంభించుకున్నాయి.
