ఐపీఎల్ ప్రారంభానికి సమయం దగ్గరపడుతోంది. దేశంలో కరోనా కేసులు మళ్లీ పెరుగుతున్నాయి. దీంతో లీగ్ నిర్వహణపై సందేహాలు మొదలవుతున్నాయి. ఈ నేపథ్యంలో మ్యాచ్ల్ని సజావుగా జరిపేందుకు 50 పేజీలతో కూడిన నిబంధనల జాబితాను భారత క్రికెట్ నియంత్రణ మండలి(బీసీసీఐ) విడుదల చేసింది.
*ప్రాక్టీసు సెషన్, మ్యాచ్ జరుగుతున్నప్పుడు ఎవరైనా వీక్షకుడు లేదా అభిమాని.. క్రికెటర్లకు దగ్గరకు వెళ్లాలని ప్రయత్నిస్తే సెక్యూరిటీ గార్డులు అతడిని అదుపులోకి తీసుకుంటారు. సదరు ఆటగాడు వెంటనే తన దుస్తులను మార్చుకోవాల్సి ఉంటుంది.
*బయో బబుల్లో ఉన్న సహచర ఆటగాళ్లను కలిసే 20 సెకన్ల ముందు సదరు క్రికెటర్ చేతులు శుభ్రం చేసుకోవాలి. ఒకవేళ వీక్షకులు ఎవరైనా క్రికెటర్ల కిట్ బ్యాగ్ను తాకినా సరే, దానిని శానిటైజ్ చేయాల్సి ఉంటుంది.
*చేతులు శానిటైజ్ చేసుకున్న తర్వాతే సబ్స్టిట్యూట్, మైదానంలోకి డ్రింక్స్ తీసుకెళ్లాలి. ఆటగాళ్లు కూడా డ్రింక్స్ తాగడానికి ముందు, తర్వాత చేతులు శానిటైజ్ చేసుకోవాలి.
*ప్రతి మ్యాచ్ పూర్తయిన తర్వాత ఇరుజట్ల క్రికెటర్లు షేక్హ్యాండ్ ఇచ్చుకోవడం, కలుసుకోవడం నిషిద్ధం. స్టేడియంలో స్నానాలు కూడా చేయకూడదు. ఏంటీ డోపింగ్ అధికారులూ.. పీపీఈ కిట్లు ధరించి ఆటగాళ్లకు పరీక్షలు జరపాలి.
*వినోద కార్యకలాపాల్లో భాగంగా గోల్ఫ్ కోర్స్కు జట్టు సభ్యులు వెళ్లాలంటే సదరు ఫ్రాంచైజీ, బీసీసీఐ వైద్యుడు నుంచి కనీసం 24 గంటల ముందు అనుమతి తీసుకోవాల్సి ఉంటుంది.
*హోటల్ నుంచి గోల్ఫ్ కోర్స్కు వెళ్లడంలో భాగంగా క్రికెటర్లకు కేటాయించిన వాహనాలు ఎక్కడ ఆగకూడదు.
*ఏప్రిల్ 9 నుంచి షురూ అయ్యే ఐపీఎల్ ప్రారంభం మ్యాచ్లు ముంబయి, చెన్నైలోజరగుతాయి. ఆ తర్వాత దిల్లీ, బెంగళూరు, కోల్కతా, అహ్మదాబాద్లో నిర్వహిస్తారు. తొలి పోరు ముంబయి-బెంగళూరు జట్ల మధ్య జరగనుంది.
