ఇండియన్ ప్రీమియర్ లీగ్ (ఐపీఎల్) 13వ సీజన్కు కౌంట్డౌన్ ప్రారంభమైంది. యూఏఈ వేదికగా జరగనున్న ఈ టోర్నీలో దేశీయ ఆటగాళ్లతో పాటు విదేశీ క్రికెటర్లూ భాగం కానున్నారు. వారిలో ప్రతిభావంతులైన హార్డ్ హిట్టింగ్ టాప్ బ్యాట్స్మెన్ దగ్గర నుంచి అద్భుత బౌలర్లు, వికెట్ కీపర్లు ఈసారి ఐపీఎల్లో పాల్గొంటున్నారు.
విదేశీ ఆటగాళ్లలో ఎక్కువమంది టీ20 ఫార్మాట్లో గణనీయంగా రాణిస్తున్నారు. వారంతా ఐపీఎల్లోనూ కీలకంగా మారే అవకాశం ఉంది. అలాంటి సత్తా కలిగినా.. అంత ప్రాధాన్యం లభించని ఆటగాళ్లు ఏ ఫ్రాంచైజీలో ఉన్నారో తెలుసుకుందాం.
5) మార్కస్ స్టోయినిస్ (దిల్లీ క్యాపిటల్స్)
అరుదైన ఆటగాళ్ల జాబితాకు చెందిన వాడు మార్కస్ స్టోయినిస్. ఏ స్థానంలోనైనా బ్యాటింగ్, నిలకడగా బౌలింగ్ చేయగల సామర్థ్యం ఇతనిలో ఉన్నాయి. టీ20 ఫార్మాట్కు స్టోయినిస్ ఆటతీరు బాగా నప్పుతుంది. ఆస్ట్రేలియాకు చెందిన ఈ క్రికెటర్లో మంచి ఫీల్డర్ కూడా ఉన్నాడు.
2015లో క్రికెట్ కెరీర్ ప్రారంభించిన స్టోయినిస్కు ఆరంభంలో ఒడుదుడుకులు ఎదురయ్యాయి. తిరిగి రాణించాలని కలగా పెట్టుకున్న స్టోయినిస్.. 2017లో కివీస్తో జరిగిన మ్యాచ్లో 146 పరుగులు చేసి నాటౌట్గా నిలిచాడు. 2018-19 ఏడాదికిగానూ ఆస్ట్రేలియా వన్డే క్రికెటర్ ఆఫ్ ది ఇయర్గా గుర్తింపు పొందాడు. 2019 ప్రపంచకప్లోనూ భాగమయ్యాడు.
బిగ్బాష్ లీగ్ 2018-19లో మెల్బోర్న్ స్టార్స్కు ప్రాతినిధ్యం వహించిన స్టోయినిస్ అత్యధిక పరుగులు చేసిన ఆటగాడిగా ఘనత సాధించాడు. ఆ టోర్నీలో 53.30 సగటుతో 533 పరుగులు సాధించి.. అదే సమయంలో 14 వికెట్లు పడగొట్టాడు. ఆల్రౌండర్గా ప్రతిభ కనుబరుస్తున్న స్టోయినిస్ ఐపీఎల్లో దిల్లీ క్యాపిటల్స్ జట్టుకు ప్రాతినిధ్యం వహించనున్నాడు.
4) ఆండ్రూ టై (రాజస్థాన్ రాయల్స్)
ఆస్ట్రేలియాకు చెందిన ఆండ్రూ టైకి టీ20 ఫార్మాట్లో అద్భుత రికార్డు ఉంది. 26 ఏళ్ల వయసులో 2013-14 సీజన్లో ఆస్ట్రేలియా-ఏ జట్టు ద్వారా అరంగేట్రం చేసిన టై.. అనతికాలంలోనే టాప్ ర్యాంక్ ఆటగాడిగా ఎదిగాడు. మూడేళ్ల తర్వాత భారత్తో జరిగిన సిరీస్లో ఆసీస్ జట్టుకు ప్రాతినిధ్యం వహించాడు. ఐపీఎల్లో తొలుత గుజరాత్ లయన్స్ జట్టులో ఆడి.. తొలి మ్యాచ్లోనే హ్యాట్రిక్ సాధించాడు. అరంగేట్రంలోనే (5/17) అసాధారణ ప్రతిభ కనబరచాడు.
దీంతో 2018లో ఐపీఎల్ కోసం జరిగిన వేలంలో ఆండ్రూ టై కోసం చెన్నై, రాజస్థాన్, పంజాబ్ యాజమాన్యాలు తీవ్రంగా పోటీ పడ్డాయి. చివరికి పంజాబ్ జట్టు రూ.7.2 కోట్లతో అతడిని సొంతం చేసుకుంది. ఆ ఏడాది టోర్నీలో 24 వికెట్లు సాధించి పర్పుల్ క్యాప్ను అందుకున్నాడు. ఐపీఎల్ 13వ సీజన్లోనూ అదే ప్రదర్శనతో ఆకట్టుకుంటాడని అభిమానులు ఆశిస్తున్నారు.
3) అలెక్స్ కారే (దిల్లీ క్యాపిటల్స్)
వికెట్ కీపింగ్లో నైపుణ్యాలను అద్భుతంగా ప్రదర్శిస్తున్నాడు ఆస్ట్రేలియాకు చెందిన అలెక్స్ కారే. దీంతో పాటు స్టార్ బ్యాట్స్మన్గా గుర్తింపు పొందాడు. 2015-16 సీజన్లో 500 పరుగులు సాధించి.. వికెట్ కీపర్గా 50 ఔట్లలో పాలుపంచుకున్నాడు. ఐపీఎల్లో దిల్లీ క్యాపిటల్స్ జట్టులో కీపర్గా రిషబ్ పంత్ ఉండగా.. అతడికి ప్రత్యామ్నాయంగా కారేను జట్టులోకి తీసుకున్నారు.
2) జోష్ ఫిలిప్స్ (రాయల్ ఛాలెంజర్స్ బెంగళూరు)
ఆస్ట్రేలియాకు చెందిన జోష్ ఫిలిప్స్.. పరిమిత ఓవర్ల క్రికెట్లో అత్యుత్తమ ప్రతిభ కనబరుస్తున్నాడు. ఏడాది ప్రారంభంలో జరిగిన బిగ్బాష్ లీగ్లో అద్భుత ప్రదర్శనతో ఆకట్టుకున్నాడు. ఆ టోర్నీలో 37.46 సగటుతో 487 పరుగులతో అత్యధిక రన్స్ చేసిన మూడో బ్యాట్స్మన్గా నిలిచాడు. మెల్బోర్న్ స్టార్స్పై జరిగిన ఫైనల్ మ్యాచ్లో 29 బంతుల్లో 52 పరుగులు సాధించి సిడ్నీ సిక్సర్స్ జట్టుకు విజయాన్ని అందించడం సహా మ్యాన్ ఆఫ్ ద మ్యాచ్ అవార్డు దక్కించుకున్నాడు.
సెప్టెంబరులో జరగనున్న ఇంగ్లాండ్ పర్యటనతో అంతర్జాతీయ క్రికెట్లో అరంగేట్రం చేయనున్నాడు ఫిలిప్స్. ఐపీఎల్-2020 వేలంలో ఈ ఆటగాడికి నిర్ణయించిన రేటు కంటే తక్కువ మొత్తాన్ని వెచ్చించి (రూ.20 లక్షలు) రాయల్ ఛాలెంజర్స్ యాజమాన్యం సొంతం చేసుకుంది.
1)మిచెల్ సాంట్నర్ (చెన్నై సూపర్కింగ్స్)
ఈ ఏడాది ఐపీఎల్ వేలంలో నిర్లక్ష్యానికి గురైన ఆటగాడు న్యూజిలాండ్కు చెందిన మిచెల్ సాంట్నర్. యూఏఈ లాంటి మందకొడి పిచ్లపై తన బౌలింగ్తో మాయ చేయగల సామర్థ్యం ఈ ఆటగాడిలో ఉంది. 2015లో ఇంగ్లాండ్పై తొలి ప్రదర్శన చేశాడు. ఇతడు అంత బలవంతుడు కాకపోయినప్పటికీ బంతిని చాలా బలంగా విసరగలడు. ఈ బౌలర్ శైలి యూఏఈ మైదానాలకు అనుకూలంగా ఉంటుంది. ఐపీఎల్ 13వ సీజన్లో చెన్నైకి ప్రాతినిధ్యం వహిస్తున్నాడు.
