టీమిండియా పేసర్ భువనేశ్వర్ కుమార్.. మైదానంలో చాలా నెమ్మదిగా, కూల్గా కనిపిస్తాడు. అయితే తనలోని మరో కోణమూ ఉందని తాజాగా వెల్లడించాడు. తన భార్య నుపుర్తో కలిసి ఓ చిన్నపాటి చాట్ షోలో పాల్గొన్నాడు. పలు విషయాలు పంచుకున్నాడు. ఇందులో తన వ్యక్తిగత జీవితానికి సంబంధించిన సంగతుల్ని చెప్పాడు.
2012లో భారత్-పాకిస్థాన్ మధ్య జరిగిన వన్డేతో అరంగేట్రం చేశాడు భువీ. మంచి ప్రదర్శనతో టీమిండియాలో చోటు నిలబెట్టుకున్న ఇతడు.. గతేడాది మాత్రం గాయాలతో సతమతమయ్యాడు. చివరికి జట్టులో చోటూ కోల్పోయాడు. ఇటీవల దక్షిణాఫ్రికాతో జరిగిన వన్డే సిరీస్కు ఎంపికయ్యాడు. కరోనా కారణంగా అనూహ్యంగా అది రద్దయింది.
ఆమె హ్యాక్ చేసింది
"నుపుర్ చాలా సార్లు నా ఫేస్బుక్ పాస్వర్డ్ అడిగింది. ఎప్పుడూ ఏదో కారణం చెప్పి తప్పించుకునేవాడిని. ఓరోజు తను నా అకౌంట్ పాస్వర్డ్ను నాకే చెప్పగా షాకయ్యా. నిజానికి ఆమె నా అకౌంట్ హ్యాక్ చేసింది. అందుకే అప్పట్నుంచి నేను ఫేస్బుక్ వాడటం మానేశాను"
-- భువనేశ్వర్ కుమార్, టీమిండియా బౌలర్
అసూయపడేదాన్ని
ఎవరైనా మహిళా అభిమానులతో భువీ ఫొటోలు తీసుకుంటున్నప్పుడు తను బాగా ఆసూయపడేదాన్నని చెప్పింది నుపుర్.
"ఎవరైనా అమ్మాయిలు ఫొటోలు తీసుకుంటున్నప్పుడు నేను అసూయపడేదాన్ని. అమ్మాయిలైతే కాస్త దూరంగా జరగమని చెప్పమనేదాన్ని. అయితే భువీ మాత్రం వాళ్లు నా దగ్గరగా వస్తే నన్నేం చేయమంటావ్ అని ప్రశ్నించేవాడు"
-- నుపుర్, భువీ భార్య
త్వరగా ఔటవ్వకూడదని కోరుకుంటా
" నుపుర్కు క్రికెట్ గురించి.. రీప్లే , లైవ్ మ్యాచ్లకు తేడా తెలియదు. అయితే మైదానంలో బ్యాటింగ్కు దిగేటప్పుడు త్వరగా ఔటవ్వకూడదని దేవుడ్ని ప్రార్థిస్తాను. ఎందుకంటే ఆ తర్వాత తను బాగా హేళన చేస్తుంది"
-- భువనేశ్వర్ కుమార్, టీమిండియా బౌలర్
అప్పుడు భలే అనిపించింది
" పాకిస్థాన్తో మ్యాచ్లో భువీ ఆడేటప్పుడు నేను, నా ఫ్రెండ్స్ హోటల్ రూమ్లో ఉన్నాం. భువీ నాకు తెలుసని నా స్నేహితులకు తెలియదు. అయితే అతడి బౌలింగ్ నచ్చి అందరూ తన కోసం మాట్లాడుకునేవారు. అందరూ ఆ 15వ నంబర్ టీ షర్ట్ వేసుకున్న కుర్రాడు భలే బౌలింగ్ చేస్తున్నాడని పొగుడుతుంటే ఉప్పొంగిపోయేదాన్ని. అంతేకాదు భువీకి బాగానే డిమాండ్ ఉందని అప్పుడు అర్థమైంది"
-- నుపుర్, భువీ భార్య
తనకు 13 ఏళ్ల వయసున్నప్పుడు నుపుర్ను చూసి ప్రేమలో పడినట్లు చెప్పాడు భువీ. ఆ తర్వాత ఆ ఇష్టం స్నేహంగా మారి చివరికి 2017, నవంబర్ 26న పెళ్లి చేసుకునేవరకు వచ్చిందన్నాడు.