విజయాల 'విరాట్'.. రికార్డుల 'కోహ్లీ'నూర్​

దక్షిణాఫ్రికాతో జరుగుతోన్న రెండో టెస్టులో డబుల్ సెంచరీ సాధించిన విరాట్ కోహ్లీ పలు రికార్డులను నమోదు చేశాడు. భారత్ తరఫున టెస్టుల్లో అత్యధిక పరుగులు చేసిన సారథిగా తన రికార్డును తానే బ్రేక్​ చేసుకున్నాడు.

విరాట్​ కోహ్లీ... ప్రపంచ క్రికెట్​లోని అన్ని ఫార్మాట్​లలో ప్రస్తుతమున్న అత్యుత్తమ బ్యాట్స్​మన్. భారత్ నుంచి గొప్ప టెస్టు కెప్టెన్​గానూ పేరు తెచ్చుకున్నాడు. సుదీర్ఘ ఫార్మాట్​లో 4 పరుగుల నుంచి ప్రస్థానం ప్రారంభించి.. నిరంతర సాధన, ఆటమీద మక్కువతో 254* పరుగుల వ్యక్తిగత మైలురాయిని అందుకున్నాడు. ఇప్పటికే పరిమిత ఓవర్ల క్రికెట్​లో ఎందరో దిగ్గజాల సరసన చేరిన ఈ ఆటగాడు.. తాజాగా టెస్టుల్లో ఎన్నో రికార్డులను బ్రేక్​ చేశాడు.

టెస్టుల్లో బ్రాడ్​మన్​, సచిన్​, గంగూలీ, రికీ పాంటింగ్​ వంటి ఎందరో దిగ్గజ క్రికెటర్ల రికార్డులను అధిగమించాడు కోహ్లీ. స్మిత్​, రోహిత్​ వంటి మరెందరికో తనదైన రీతిలో పోటీనిస్తున్నాడు.

'డబుల్​'​ స్కోరర్​..

విరాట్​ కోహ్లీ తన టెస్టు కెరీర్​లో అత్యధిక వ్యక్తిగత స్కోరును నమోదు చేశాడు. దక్షిణాఫ్రికాతో రెండో టెస్టు తొలి ఇన్నింగ్స్​లో 254 పరుగులతో అజేయంగా నిలిచాడు. ఇంతకుముందు శ్రీలంకపై చేసిన 243 పరుగులే అతనికి టెస్టుల్లో ఇప్పటివరకు అత్యధికం.

కెప్టెన్​గా జోరు..

భారత్ తరఫున టెస్టుల్లో అత్యధిక పరుగులు చేసిన సారథిగా తన రికార్డును తానే బద్దలు కొట్టుకున్నాడు కోహ్లీ. 2017లో శ్రీలంకపై 243 రన్స్​ సాధించిన టీమిండియా సారథి.. తాజాగా పుణె వేదికగా దక్షిణాఫ్రికాతో జరిగిన మ్యాచ్​లో 254* పరుగులు చేశాడు.

భారత కెప్టెన్​లు అత్యధిక పరుగులు..
254* (కోహ్లీ) vs దక్షిణాఫ్రికా (2019)
243 (కోహ్లీ) vs శ్రీలంక (2017)
235 (కోహ్లీ) vs ఇంగ్లాండ్ (2016)
224 (ధోనీ)vs ఆస్ట్రేలియా (2012)

అత్యధిక ద్విశతకాలు...

టెస్టుల్లో టీమిండియా తరఫున అత్యధిక ద్విశతకాలు చేసిన ఆటగాడిగా చరిత్ర సృష్టించాడు కోహ్లీ. తన కెరీర్​లో 7వ ద్విశతకం చేసిన విరాట్.. భారత మాజీ క్రికెటర్లు సచిన్, సెహ్వాగ్​(6)లను అధిగమించాడు. అత్యధిక డబుల్ సెంచరీలు చేసిన భారత బ్యాట్స్​మన్​గా నిలిచాడు. ద్రవిడ్​-5, గావస్కర్​-4 సార్లు ద్విశతకాలు సాధించారు.

విధ్వంసకర వీరుల సరసన..

ఈ మ్యాచ్​లో 200 పైచిలుకు పరుగులు చేసిన విరాట్​ కోహ్లీ... టెస్టుల్లో విధ్వంసకర ఆటగాళ్ల సరసన చోటు దక్కించుకున్నాడు. 7 సార్లు 200పైగా పరుగులు చేసి వాలీ హామండ్​, జయవర్ధనే సరసన నిలిచాడు. బ్రాడ్​మన్​-12, సంగక్కర-11, లారా-9, వాలీ హామండ్​, జయవర్ధనే, కోహ్లీ-7 సార్లు ద్విశతకాలు చేశారు.

బ్రాడ్​మన్​ రికార్డు బద్దలు..

ఆస్ట్రేలియా ఆటగాడు, ప్రపంచ​ టెస్టు దిగ్గజం డాన్​ బ్రాడ్​మన్​ రికార్డునూ బ్రేక్​ చేశాడు కోహ్లీ. టెస్టుల్లో బ్రాడ్​మన్​(6996) రన్స్​ చేశాడు. విరాట్​ 7,054 పరుగుల మైలురాయిని చేరుకున్నాడు. అన్ని ఫార్మాట్లలో కలిపి 21వేల మార్కును అధిగమించాడు.

టెస్టుల్లో అత్యధిక పరుగులు చేసిన వారిలో 53వ స్థానంలో ఉన్నాడు విరాట్​(7,054*). భారత బ్యాట్స్​మన్లలో 7వ స్థానంలో ఉన్నాడు. ఇతడి కంటే ముందు సచిన్ తెందూల్కర్​(15,921), ద్రవిడ్​(13,265), గావస్కర్(10,122), లక్ష్మణ్​(8,781), సెహ్వాగ్​(8,503), గంగూలీ(7,212) ఉన్నారు.

26 శతకాల వీరుడు..

టెస్టుల్లో అత్యంత తక్కువ ఇన్నింగ్స్​ల్లో 26 సెంచరీల రికార్డు సాధించిన నాలుగో క్రికెటర్​ కోహ్లీ. ఈ ఫార్మాట్​లో ఆస్ట్రేలియా క్రికెటర్​ స్టీవ్​ స్మిత్​ను సమం చేశాడీ బ్యాట్స్​మన్. ఈ ఘనతను విరాట్ 81 టెస్టుల్లో సాధించగా.. స్మిత్ 67 టెస్టులు తీసుకున్నాడు.

26 సెంచరీలు సాధించిన ఆటగాళ్లు (తక్కువ ఇన్నింగ్స్​ల్లో)

69 ఇన్నింగ్స్​లు -డాన్​ బ్రాడ్​మన్​(ఆస్ట్రేలియా)
121 ఇన్నింగ్స్​లు -స్టీవ్​ స్మిత్​(ఆస్ట్రేలియా)
136 ఇన్నింగ్స్​లు -సచిన్​ తెందూల్కర్​(భారత్​)
138 ఇన్నింగ్స్​లు -విరాట్​ కోహ్లీ(భారత్​)
144 ఇన్నింగ్స్​లు -సునీల్​ గవాస్కర్​(భారత్​)
145 ఇన్నింగ్స్​లు -మాథ్యూ హెడెన్​(ఆస్ట్రేలియా)

సఫారీలపై తక్కువ ఇన్నింగ్స్​ల్లో @1000

సఫారీలపై టెస్టుల్లో వేయి పరుగులు చేశాడు విరాట్ ​కోహ్లీ. 19 ఇన్నింగ్స్​ల్లోనే ఈ ఘనత సాధించాడు. ఇప్పటివరకు ఈ రికార్డు సాధించిన ముగ్గురు భారత ఆటగాళ్లనూ అధిగమించాడీ క్రికెటర్. ఇతడి కంటే ముందు సెహ్వాగ్​(20), తెందూల్కర్​(29), ద్రవిడ్​(30) ఉన్నారు. ఓవరాల్​గా నలుగురు మాత్రమే కోహ్లీ కంటే ముందు దక్షిణాఫ్రికాపై వేయి పరుగులు చేశారు. డెన్నిస్​ క్రాంప్టన్​(13), నీల్​ హార్వే(13), డేవిడ్​ వార్నర్​(18), మైకేల్​ క్లార్క్​(18) ఈ రికార్డు అందుకున్నారు.

కెప్టెన్​@50

ఇప్పటివరకు 50 టెస్టు మ్యాచ్​లు ఆడిన రెండో భారత కెప్టెన్​గా రికార్డు సృష్టించాడు విరాట్. గతంలో 2008 నుంచి 2014 వరకు కెప్టెన్​గా ఉన్న ధోనీ.. 60 మ్యాచ్​లకు ప్రాతినిధ్యం వహించి అగ్రస్థానంలో ఉన్నాడు. భారత మాజీ సారథి గంగూలీ(49)మూడో స్థానానికి పడిపోయాడు.

కెప్టెన్​గా 150+ స్కోర్లు....

కెప్టెన్​గా 150 పైగా పరుగులు ఎక్కువ సార్లు సాధించి.. ఆసీస్​ దిగ్గజం బ్రాడ్​మన్​ను అధిగమించాడు. ఈ ఫార్మాట్​లో కెప్టెన్​గా 9 సార్లు 150 పైచిలుకు పరుగులు చేసి, బ్రాడ్​మన్(8)​ను వెనక్కినెట్టాడు. బ్రియన్ లారా, మహేలా జయవర్ధనే, గ్రేమ్ స్మిత్, క్లార్క్ 7సార్లు డబుల్ సెంచరీలు చేశారు.

టెస్టు కెప్టెన్​గా అత్యధిక సెంచరీలు సాధించిన ఆటగాళ్లలో పాంటింగ్​ సరసన చేరాడు కోహ్లీ(19). గ్రేమ్​ స్మిత్​ (25) అగ్రస్థానంలో ఉన్నాడు.

సౌతాఫ్రికాపై అత్యధిక వ్యక్తిగత స్కోరు(టెస్టుల్లో)

సఫారీలపై అత్యధిక వ్యక్తిగత స్కోరు చేసిన రెండో భారతీయుడిగా రికార్డు సృష్టించాడు రన్​ మెషీన్​. సెహ్వాగ్​ 319 పరుగులు చేయగా... కోహ్లీ 254*తో రెండో స్థానంలో నిలిచాడు. మయాంక్​- 215, రోహిత్​-176 తర్వాతి స్థానాల్లో ఉన్నారు.

కోహ్లీకి ప్రత్యేకం..(టెస్టుల్లో)

పుణె వేదికగా దక్షిణాఫ్రికాతో జరుగుతోన్న రెండో టెస్టులో శతకం సాధించాడు విరాట్​ కోహ్లీ. కెరీర్​లో​ 26వ టెస్టు సెంచరీ కాగా... కెప్టెన్​గా 19వది. అదే విధంగా ఈ ఏడాదిలో తొలి టెస్టు శతకం నమోదు చేశాడీ స్టార్​ బ్యాట్స్​మన్​. సొంతగడ్డ మీద సౌతాఫ్రికా జట్టుపై మొదటి సెంచరీ సాధించాడు.
టెస్టు సెంచరీల్లో ఆసీస్​ ఆటగాడు స్మిత్​తో పోటీపడుతున్నాడు. ఇద్దరూ 26 శతకాలతో కొనసాగుతున్నారు.

11 ఇన్నింగ్స్​ల తర్వాత ఈ మ్యాచ్​లో సెంచరీ చేశాడు విరాట్ కోహ్లీ. ఇప్పటివరకు ఇంత ఎక్కువ వ్యవధి ఎప్పుడూ తీసుకోలేదు ఈ స్టార్ క్రికెటర్. 2019లో ఎనిమిది ఇన్నింగ్స్​లు ఆడి 2 అర్ధశతకాలు సాధించాడు.

భాగస్వామ్యంలోనూ భేష్​...

టెస్టుల్లో దక్షిణాఫ్రికాపై నాలుగో వికెట్‌కు అత్యధిక భాగస్వామ్యం(178) నమోదు చేసింది కోహ్లీ- రహానే జోడి. ఇప్పటివరకు ఈ రికార్డు ద్రవిడ్‌-గంగూలీ (145) పేరిట ఉండేది. తర్వాత సెహ్వాగ్​-బద్రినాథ్​ (136) ఉన్నారు.

సగటు పెరిగిపోయింది...

విరాట్​ కోహ్లీ సగటు ఒక్కసారిగా పెరిగింది. పుణె టెస్టు ముందు వరకు 53.13 సగటుతో ఉన్న కోహ్లీ... ప్రస్తుతం 55.11*తో ఉన్నాడు.