భారత్-దక్షిణాఫ్రికా మధ్య వన్డే సిరీస్ రద్దయింది. కరోనా నేపథ్యంలో ఈ నిర్ణయం తీసుకున్నట్లు ప్రకటించింది బీసీసీఐ. మూడు వన్డేల సిరీస్‌లో భాగంగా మార్చి 12న ధర్మశాలలో తొలి వన్డే జరగాల్సి ఉండగా.. వర్షం కారణంగా ఒక్క బంతీ పడకుండానే రద్దు చేశారు. ఈ నెల 15న లఖ్నవూలో రెండో వన్డే, 18న కోల్‌కతాలోని ఈడెన్ గార్డెన్స్‌లో చివరి వన్డే జరగాల్సి ఉంది. ఈ మ్యాచ్లు అభిమానులు లేకుండా నిర్వహించాలని అనుకున్నారు. కానీ కరోనా వైరస్ వ్యాప్తి నేపథ్యంలో మొత్తం సిరీస్‌ను రద్దు చేశారు.
కోవిడ్-19 కారణంగా ప్రపంచవ్యాప్తంగా ఇప్పటికే కొన్ని క్రీడా టోర్నీలు వాయిదా పడ్డాయి. తాజాగా ఈ నెలలో ప్రారంభం కావాల్సిన ఐపీఎల్‌ను కూడా బీసీసీఐ వాయిదా వేసింది.
వీటికీ సెగ తగిలింది..
కరోనా సెగ పాకిస్థాన్ సూపర్‌ లీగ్‌(పీఎస్‌ఎల్‌)కు కొంచెం తగిలింది. వైరస్కు భయపడి ఆ టోర్నీ నుంచి ఇంగ్లండ్‌ ఆటగాళ్లు స్వదేశానికి పయనమయ్యారు. కొందరు క్రికెటర్లు వెళ్లిపోయినా లీగ్‌ మాత్రం యధాతథంగా కొనసాగుతుందని పీఎస్‌ఎల్‌ యాజమాన్యం స్పష్టం చేసింది. అయితే కరోనా వైరస్‌ను ప్రపంచ ఆరోగ్య సంస్థ మహమ్మారిగా ప్రకటించడం వల్ల ఇక మీదట ఏ మ్యాచ్ అయినా ప్రేక్షకులు లేకుండానే జరగనున్నాయి. శ్రీలంక-ఇంగ్లాండ్ మధ్య రెండు మ్యాచ్ల టెస్టు సిరీస్ కూడా తాజాగా రద్దయింది.
