ఐసీసీ టెస్టు ఛాంపియన్షిప్లో భారత్ అగ్రస్థానంలో కొనసాగుతోంది. సొంతగడ్డపై దక్షిణాఫ్రికాతో జరిగిన మూడు టెస్టుల సిరీస్ను 3-0 తేడాతో నెగ్గి మొదటి స్థానాన్ని పదిలం చేసుకుంది. మొత్తం 240 పాయింట్లు సాధించింది కోహ్లీసేన.
ఈ సిరీస్లో 120 పాయింట్లు ఖాతాలో వేసుకుంది టీమిండియా. ఒక్కో మ్యాచ్కు 40 పాయింట్ల చొప్పున మూడు టెస్టులకుగానూ 120 పాయింట్లు కైవసం చేసుకుంది. ఈ సిరీస్కు ముందు వెస్టిండీస్ పైనా 2-0 తేడాతో నెగ్గి 120 పాయింట్లు సాధించింది.
టెస్టు ఛాంపియన్షిప్లో భారత్.. అగ్రస్థానాన్ని మరింత పదిలంచేసుకునే అవకాశముంది. వచ్చే నెల 14 నుంచి బంగ్లాదేశ్తో రెండు టెస్టుల సిరీస్ ఆడనుంది. ఈ మ్యాచ్లు సొంతగడ్డపై జరగనున్నాయి. ఈ కారణంగా టీమిండియా పాయింట్ల పట్టికలో మొదటి స్థానాన్ని మెరుగుపర్చుకోవాలని భావిస్తోంది.
శ్రీలంక, న్యూజిలాండ్ చెరో 60 పాయింట్లతో రెండు, మూడు స్థానాల్లో ఉన్నాయి. ఇటీవల జరిగిన రెండు టెస్టుల సిరీస్ను 1-1 తేడాతో డ్రా చేసుకున్నాయి. ఇంగ్లాండ్, ఆస్ట్రేలియా చెరో 56 పాయింట్లతో తదుపరి స్థానాల్లో ఉన్నాయి. 5 మ్యాచ్ల యాషెస్ సిరీస్ 2-2 తేడాతో డ్రా అయింది.
టెస్టు ఛాంపియన్షిప్లో సిరీస్కు 120 పాయింట్లు ఉంటాయి. పాయింట్ల పట్టికలో టాప్-2లో ఉన్న జట్లు ఫైనల్కు అర్హత సాధిస్తాయి. తుదిపోరు 2021 జులైలో జరగనుంది. టోర్నీలో భాగంగా ప్రతి జట్టు స్వదేశంలో మూడు, విదేశాల్లో మూడు సిరీస్లు ఆడుతుంది.
ఇదీ చదవండి: కోహ్లీ, కోచ్ వల్లే ఇలా ఆడగలిగా: రోహిత్
