అంతర్జాతీయ క్రికెట్ మండలి(ఐసీసీ) ప్రకటించిన తాజా టెస్టు ర్యాంకింగ్స్పై ఇంగ్లాండ్ మాజీ కెప్టెన్ మైఖేల్ వాన్ విమర్శలు సంధించాడు. అత్యంత చెత్తగా ర్యాంకింగ్స్ ప్రకటించారని అభిప్రాయపడ్డాడు. టెస్టుల్లో న్యూజిలాండ్, ఇంగ్లాండ్ సరైన ప్రదర్శన చేయనప్పటికీ ఆ జట్లు రెండు, నాలుగు స్థానాల్లో ఉండటమేంటో అర్థం కావట్లేదని అన్నాడు.
"ఐసీసీ ప్రకటించిన తాజా టెస్టు ర్యాంకింగ్స్పై నిజాయితీగా మాట్లాడలనుకుంటున్నా. అత్యంత చెత్తగా ర్యాంకింగ్స్ను ఇచ్చారు. గత రెండేళ్లుగా టెస్టుల్లో న్యూజిలాండ్ ఏ మేరకు రాణించిందో నాకు అర్థం కావట్లేదు. మొన్నటివరకు ఇంగ్లాండ్ మూడో స్థానంలో ఉంది. ఇప్పుడు నాలుగో ర్యాంకుకు దిగజారింది. మూడేళ్లుగా ఇంగ్లీష్ జట్టు.. టెస్టుల్లో ఇబ్బంది ఎదుర్కొంటోంది. ముఖ్యంగా విదేశాల్లో ఆ జట్టు ప్రదర్శన చెప్పుకోదగ్గ స్థాయిలో లేదు. స్వదేశంలో ఒకే ఒక్క సిరీస్ నెగ్గింది. యాషెస్ సిరీస్లోనూ డ్రాతో సరిపెట్టుకుంది. ఐర్లాండ్ లాంటి చిన్న జట్టుపైనే వారు గెలిచారు" -మైఖేల్ వాన్, ఇంగ్లాండ్ మాజీ కెప్టెన్
ఈ ర్యాంకింగ్స్ ప్రకటించడం చూసి తనకు అయోమయంగా అనిపించిందని అన్నాడు వాన్
"నా అభిప్రాయం ప్రకారం న్యూజిలాండ్ రెండో స్థానంలో ఉండే అంత పటిష్ఠ జట్టు కాదు. ఆస్ట్రేలియా ఆ స్థానానికి తగిన జట్టు. ఈ ర్యాంకింగ్స్ ఇవ్వడం చూసి నాకు అయోమయంగా అనిపించింది." - మైఖేల్ వాన్, ఇంగ్లాండ్ మాజీ కెప్టెన్
ప్రస్తుతం టెస్టుల్లో భారత్, ఆస్ట్రేలియానే అత్యుత్తమ జట్లని కితాబిచ్చాడు వాన్.
"సుదీర్ఘ ఫార్మాట్లో భారత్, ఆస్ట్రేలియా.. అత్యుత్తమ జట్లు అనడంలో ఎలాంటి సందేహం లేదు. ఆసీస్ను ఓడించగల సత్తా ఉన్న ఏకైక జట్టు టీమిండియానే. ఏడాది క్రితం ఆసీస్ ఒత్తిడిలో ఉన్న మాట వాస్తవం. ప్రస్తుతం ఐదో ర్యాంకులో ఉంది. స్మిత్, వార్నర్, లబుషేన్ లాంటి స్టార్లు లేనప్పుడు వారు ఆ ర్యాంకులో ఉన్నారు. ఇప్పుడు పరిస్థితి మారింది." -మైఖేల్ వాన్, ఇంగ్లాండ్ మాజీ కెప్టెన్
దక్షిణాఫ్రికా - ఇంగ్లాండ్ మధ్య నాలుగు టెస్టుల సిరీస్లో భాగంగా తొలి మ్యాచ్ గురువారం నుంచి మొదలుకానుంది. సెంచూరియన్ వేదిక.
ఇదీ చదవండి: 'ఆస్ట్రేలియా ఓపెన్' ప్రైజ్మనీ భారీగా పెరిగిందోచ్
