పార్థివ్​ పటేల్ రిటైర్మెంట్​పై మాజీల స్పందన

ప్రముఖ క్రికెటర్​ పార్థివ్​ పటేల్​.. అంతర్జాతీయ క్రికెట్​కు వీడ్కోలు పలికిన నేపథ్యంలో పలువురు మాజీలు ఈ విషయమై స్పందించారు. పార్థివ్​ భవిష్యత్​కు ఆల్ ది బెస్ట్ చెప్పారు.

దిగ్గజ క్రికెటర్లు సౌరభ్​ గంగూలీ, అనిల్​ కుంబ్లే.. కెప్టెన్లలో తనకెప్పుడూ ప్రత్యేకంగా నిలిచిపోతారని వికెట్ కీపర్ బ్యాట్స్​మన్ పార్థివ్​ పటేల్​ అన్నాడు. వారిద్దరూ నాయకుడనే పదానికి నిదర్శనమని చెప్పాడు. బుధవారం(డిసెంబరు 9) రిటైర్మెంట్​ ప్రకటించిన​ సందర్భంగా తనకు మద్దతుగా నిలిచిన గంగూలీ, కుంబ్లే గురించి ఓ వర్చువల్​ ఇంటర్వ్యూలో వెల్లడించాడు.

"నా దృష్టిలో​ గంగూలీ నాయకుడనే పదానికి నిదర్శనంలా కనిపిస్తాడు. నేనిలా ఉండటానికి దాదా, కుంబ్లే లాంటి గొప్ప నాయకులే కారణం. నా పేరును తప్పుగా ముద్రించిన టెస్టు క్యాప్​ను నాకు దాదా ఇచ్చాడు. అది ఇప్పటికీ నా దగ్గరే ఉంది. నా కెరీర్​లో హెడ్డింగ్లీ (2002), అడిలైడ్​ (2003-04) సిరీస్​లతో పాటు రావల్పిండిలో అర్ధసెంచరీ చేసినవి నా మధురమైన జ్ఞాపకాలు. క్రికెట్​కు వీడ్కోలు పలకాలని ఏడాదిగా అనుకుంటున్నా.. అందుకు సరైన సమయం రాలేదు. దేశవాళీలో అన్ని ట్రోఫీలతో పాటు ఐపీఎల్​లోనూ మూడు ట్రోఫీలు గెల్చుకోవడం సహా గుజరాత్​ క్రికెట్​ రూపురేఖలు మార్చడానికి కృషి చేశాను"

- పార్థివ్​ పటేల్​, టీమ్​ఇండియా మాజీ క్రికెటర్​

అంతర్జాతీయ క్రికెట్​కు వికెట్​ కీపర్​ బ్యాట్స్​మన్ పార్థివ్ పటేల్ రిటైర్మెంట్​ ప్రకటించాడు. అన్ని ఫార్మాట్ల నుంచి తప్పుకుంటున్నట్లు బుధవారం(డిసెంబరు 9) ప్రకటించాడు. ఈ నేపథ్యంలోనే పార్థివ్​​ రిటైర్మెంట్​పై పలువురు మాజీలు స్పందించారు.

"భారత క్రికెట్​కు పార్థివ్​ పటేల్​ ఓ తెలివైన ప్రచారకర్త. కెప్టెన్​ కావాల్సినా సరే జట్టు సభ్యునిలా ఉన్నాడు. 17 ఏళ్ల వయసులోనే అంతర్జాతీయ క్రికెట్​లో అరంగేట్రం చేశాడు. క్రికెట్​లో అతడి అద్భుతమైన ప్రదర్శనే దేశవాళీతో పాటు అంతర్జాతీయ క్రికెట్​లో పురస్కారాలను తెచ్చిపెట్టింది. తన అద్భుతమైన కెరీర్​కు అభినందనలు తెలియజేయడం సహా భవిష్యత్​ ప్రయత్నాలకు శుభాకాంక్షలు"

- సౌరభ్​ గంగూలీ, బీసీసీఐ అధ్యక్షుడు

"అద్భుతమైన కెరీర్​కు అభినందనలు పార్థివ్​. నీ వైఖరి ఎప్పుడూ అండగా నిలిచింది. రావల్పిండిలో పాకిస్థాన్​తో టెస్టులో ఓపెనర్​గా ఆడిన మీ ఇన్నింగ్స్​ నాకు ఇప్పటికీ గుర్తుంది. మీ భవిష్యత్​కు శుభాకాంక్షలు"

- సచిన్​ తెందుల్కర్​, దిగ్గజ క్రికెటర్​

"అద్భుతమైన కెరీర్​ను రూపొందించుకున్న పార్థివ్​ పటేల్​కు శుభాకాంక్షలు. అతడితో అనుబంధం నా జీవితంలో మధుర క్షణాలుగా నిలిచిపోతాయి. నాకు తెలిసి భవిష్యత్​లోనూ నువ్వు ఆట కోసమే నీ జీవితాన్ని వెచ్చిస్తావు. నీ జీవితంలోని రెండో ఇన్నింగ్స్​కు గుడ్​లక్"

- వీవీఎస్​ లక్ష్మణ్​​, టీమ్​ఇండియా మాజీ క్రికెటర్​

"నీ భవిష్యత్​ ప్రణాళికలకు ఆల్​ ది బెస్ట్​. క్రికెట్​లో మీ ఉత్తమమైన కెరీర్​కు అభినందనలు. మీతో కలిసి మైదానంలో ఆడటం నాకెంతో ఆనందంగా ఉంది".

- జస్​ప్రీత్​ బుమ్రా, టీమ్​ఇండియా పేసర్​

పార్థివ్​ టీమ్​ఇండియా తరపున 25 టెస్టులు, 38 వన్డేలు, 2 అంతర్జాతీయ టీ20లు ఆడాడు. టెస్టుల్లో 6 అర్ధసెంచరీలు సాధించి.. అత్యధికంగా 69 (పాకిస్థాన్​పై) పరుగులు చేశాడు. ఐపీఎల్​​లో 139 మ్యాచ్​లు ఆడి, 2,848 పరుగులు చేశాడు. చెన్నై సూపర్​ కింగ్స్​, ముంబయి ఇండియన్స్​ జట్లలో ఉన్నప్పుడు మూడు సార్లు ట్రోఫీని ముద్దాడాడు.

ఇదీ చూడండి: పార్థివ్ పటేల్ రిటైర్మెంట్.. అన్ని ఫార్మాట్లకు వీడ్కోలు