వైదొలగక తప్పని పరిస్థితులు ఏర్పడినప్పటికీ ఏడాది కాలం టీమ్ఇండియా కోచ్ పదవిని ఆస్వాదించానని దిగ్గజ క్రికెటర్ అనిల్ కుంబ్లే తెలిపాడు. పిల్లలు చిన్నవారు కావడం వల్ల ముంబయి ఇండియన్స్ మెంటార్‌ పదవి నుంచి తప్పుకున్నట్లు వెల్లడించాడు. ఈ సీజన్లో కింగ్స్ ఎలెవన్ పంజాబ్‌తో పనిచేసేందుకు ఆత్రుతగా ఎదురుచూస్తున్నానని వెల్లడించాడు.
"టీమ్ఇండియా కోచ్ పదవికి ఎంపికైనందుకు ఎంతో సంతోషించా. చాలా గొప్పగా అనిపించింది. జట్టు సభ్యులతో గడిపిన ఏడాది కాలం అమూల్యం. అద్భుతంగా ఆడే క్రికెటర్లతో మరోసారి డ్రస్సింగ్‌ రూమ్‌ పంచుకోవడం ఆనందకరమైన అనుభూతి. " అని కుంబ్లే అన్నాడు.
సారథి విరాట్‌ కోహ్లీ, కోచ్ అనిల్ కుంబ్లే మొదట్లో బాగానే ఉన్నా కుంబ్లే తరహా క్రమశిక్షణ విరాట్‌కు నచ్చలేదు! ఇద్దరి మధ్య కొన్ని విషయాల్లో అభిప్రాయభేదాలు రావడం వల్ల కుంబ్లేనే హుందాగా పదవి నుంచి తప్పుకున్నాడు. సచిన్‌, గంగూలీ, లక్ష్మణ్‌ వారిద్దరి మధ్య సయోధ్య కుదుర్చేందుకు ప్రయత్నించినా ఫలితం కనిపించలేదు.
ముంబయి ఇండియన్స్ కోచింగ్ బృందంలో
ఇండియన్‌ ప్రీమియర్‌ లీగ్‌లో కుంబ్లే మూడేళ్ల పాటు ముంబయి ఇండియన్స్ కోచింగ్ బృందంలో పనిచేశాడు. పిల్లలు చిన్నవారు కావడం వల్ల కుటుంబంతో గడిపేందుకు విరామం తీసుకున్నాడు.
"ఆర్‌సీబీ, ముంబయికి మార్గదర్శకుడుగా పనిచేయడం ఎంతో సంతృప్తిని ఇచ్చింది. ఎందుకంటే మొదటిసారి ముంబయి ఇండియన్స్ ట్రోఫీ గెలిచినప్పుడు నేనా బృందంలో ఉన్నా. ఆ తర్వాత జట్టు వెనుదిరిగి చూసుకోలేదు. ఏడేళ్లలో నాలుగు సార్లు విజేతగా నిలిచింది. ప్రస్తుతం కింగ్స్ ఎలెవన్‌తో పనిచేసేందుకు ఆత్రుతగా ఎదురుచూస్తున్నా. 12 ఏళ్లుగా ఆ జట్టు నిలకడగా ఆడుతోంది"
- కుంబ్లే, టీమ్ఇండియా దిగ్గజ క్రికెటర్.
ఈ ఏడాది ఐపీఎల్ సీజన్లో కింగ్స్ ఎలెవన్ జట్టుకు ప్రాతినిథ్యం వహిస్తున్నాడు కుంబ్లే.
ఇది చూడండి : గంగూలీ, జైషాలకు రెండు వారాల ఊరట
