ఒకప్పటి ఐపీఎల్ జట్టు డెక్కన్ ఛార్జర్స్ (డీసీ) యాజమాన్యం వేసిన కేసులో బీసీసీఐకి ఎదురుదెబ్బ తగిలింది. ఆ జట్టు యాజమాన్యం డెక్కన్ క్రానికల్‌ హోల్డింగ్స్‌ (డీసీహెచ్‌ఎల్‌)కు రూ.4,800 కోట్లు చెల్లించాలని.. బొంబాయి హైకోర్టు నియమించిన సుప్రీం కోర్టు విశ్రాంత న్యాయమూర్తి జస్టిస్‌ సీకే టక్కర్‌ బీసీసీఐని ఆదేశిస్తూ శుక్రవారం తీర్పు వెల్లడించారు.
ఐపీఎల్ ఆరంభ జట్లలో ఒకటైన డీసీని 2012లో లీగ్‌ నుంచి బీసీసీఐ తొలగించింది. ఓ జాతీయ బ్యాంకు నుంచి బీసీసీఐకి రూ.100 కోట్ల పూచీకత్తు ఇవ్వడంలో డీసీహెచ్‌ఎల్‌ విఫలమైందనే కారణంతో ఆ జట్టుపై వేటు వేశారు. దాని స్థానంలో మరో జట్టు కోసం బిడ్లను ఆహ్వానించగా సన్‌రైజర్స్‌ హైదరాబాద్‌ యాజమాన్యం ఆ అవకాశాన్ని దక్కించుకుంది.
అయితే లీగ్‌ నుంచి తమ జట్టును చట్ట విరుద్ధంగా తొలగించారని డీసీహెచ్‌ఎల్‌ బొంబాయి హైకోర్టును ఆశ్రయించింది. ఈ కేసు విచారించేందుకు కోర్టు జస్టిస్‌ సీకే టక్కర్‌ను నియమించింది. 8 ఏళ్లుగా సాగిన విచారణ అనంతరం ఈ ఏడాది సెప్టెంబర్‌లోగా డీసీహెచ్‌ఎల్‌కు బీసీసీఐ రూ.4,800 కోట్లు పరిహారంగా చెల్లించాలని తీర్పు వచ్చింది. దీనిపై హైకోర్టులో బీసీసీఐ సవాలు చేసే అవకాశం ఉంది.
ఇది చూడండి : 'మా వ్యూహం ఫలించింది.. టీమ్ఇండియా గెలిచింది'
