భారత స్టార్ క్రికెటర్లు జస్ప్రీత్ బుమ్రా, స్మృతి మంధాన... ప్రతిష్ఠాత్మక పురస్కారాలకు ఎంపికయ్యారు. విజ్డన్ ఇండియా అల్మానక్ ప్రతి ఏటా బహుకరించే 'క్రికెటర్ ఆఫ్ ద ఇయర్' అవార్డులను అందుకోనున్నారు. ఈ అరుదైన ఘనత సాధించిన మూడో క్రికెటర్గా మంధాన నిలిచింది. గతంలో మిథాలీ రాజ్, దీప్తి శర్మ ఈ గౌరవం పొందారు.
ఈ పురస్కారాలకు ఐదుగురి పేర్లను ఎంపిక చేశారు. ఇందులో బుమ్రా, స్మృతి.. భారత్కు చెందినవారు. వీరితో పాటు పాకిస్థాన్కు చెందిన ఫకర్ జమాన్, శ్రీలంక నుంచి కరుణరత్నె, అఫ్గానిస్థాన్ స్పిన్నర్ రషీద్ ఖాన్ చోటు దక్కించుకున్నారు.
2019-20 కాలానికిగానూ ఏడో ఎడిషన్ వార్షిక సంచికల్లో మయాంక్ అగర్వాల్ గురించి ప్రత్యేక కథనాలు ముద్రించారు. ఇటీవలే దక్షిణాఫ్రికాతో టెస్టు సిరీస్ సహా దేశవాళీ మ్యాచ్ల్లో అద్భుత ఆటతీరు కనబర్చాడీ బ్యాట్స్మెన్.
వీరితో పాటు క్రికెట్లో చేసిన సేవలకుగానూ మాజీ క్రికెటర్లు గుండప్ప విశ్వనాథ్, లాలా అమర్నాథ్లు... విజ్డన్ ఇండియా అల్మానక్ 'హాల్ ఆఫ్ ఫేమ్'లో చోటు దక్కించుకున్నారు. ప్రముఖ రచయిత ప్రశాంత్ కిదాంబి 'బుక్ ఆఫ్ ద ఇయర్' అవార్డు అందుకోనున్నాడు. ఈయన రచించిన 'అన్టోల్డ్ హిస్టరీ ఆఫ్ ద ఫస్ట్ ఆల్ ఇండియా టీమ్' బాగా పేరు తెచ్చుకుంది.
