ఇండియన్ ప్రీమియర్ లీగ్(ఐపీఎల్)ను ఈ ఏడాదే నిర్వహించడానికి భారత నియంత్రణ మండలి (బీసీసీఐ) ప్రణాళికలను చేస్తోంది. సెప్టెంబరు-నవంబరు మధ్యలో టోర్నీని నిర్వహించాలని తీవ్రంగా పరిశీలిస్తుంది. అనేక వార్తాసంస్థల నివేదిక ప్రకారం.. ఐపీఎల్ను సెప్టెంబరు 26 నుంచి నవంబరు 8 విండోను బీసీసీఐ ప్రత్యేకంగా పరిశీలిస్తుందని తెలుస్తోంది.
అయితే అదే సమయంలో ఆస్ట్రేలియా వేదికగా జరగాల్సిన టీ20 ప్రపంచకప్ వాయిదా లేదా రద్దైతే తప్ప.. బీసీసీఐకి ఐపీఎల్ను నిర్వహించే అవకాశం రాదు. సెప్టెంబరు-నవంబరు విండోను పరిగణనలోకి తీసుకుంటే.. టోర్నీని దక్షిణాదిలోనే నిర్వహించే ఛాన్స్ ఎక్కువని చెప్పవచ్చు. ఎందుకంటే ఆ సమయంలో చెన్నై, బెంగళూరు వాతావరణం సాధారణంగా ఉంటుందని బోర్డు అభిప్రాయపడుతుందని సమాచారం. అయితే కరోనాతో ముంబయి తీవ్రంగా దెబ్బతిన్న కారణంగా మ్యాచ్లను అక్కడ నిర్వహించేది లేదని తెలుస్తోంది.
కరోనా కేసులు ఎక్కువగా ఉన్న పెద్ద నగరాలతో పోలిస్తే.. వైరస్ నియంత్రణ గల టౌన్షిప్లలో ఈ టోర్నీని నిర్వహించాలని బీసీసీఐ యోచిస్తున్నట్లు ప్రచారం జరుగుతోంది. టౌన్షిప్లోని హోటళ్లను బుక్ చేసుకోవడం వల్ల ఖజానాపై కూడా భారం తగ్గుతుంది. ఆరోగ్య పరిస్థితులు మెరుగుపడే వరకు ప్రజలు ప్రయాణాలు చేసే అవకాశం లేకపోవడం వల్ల.. మార్గదర్శకాలకు కట్టుబడి బీసీసీఐ టోర్నీని నిర్వహించాల్సి ఉంటుంది.
సెప్టెంబరులో ఆసియాకప్
సెప్టెంబరు-నవంబరులో ఐపీఎల్ నిర్వహించాలని యోచిస్తే.. సెప్టెంబరులో జరగాల్సిన ఆసియా కప్ విధిపై ఆధారపడి ఉంటుంది. ఒకవేళ అదే సమయంలో ఆసియా కప్ను జరపాలని ఆసియా క్రికెట్ కౌన్సిల్ (ఏసీసీ) నిర్ణయిస్తే.. ఐపీఎల్లో మ్యాచ్లను కుదించాల్సి ఉంటుంది.
ఇదీ చూడండి... ఐపీఎల్కు సిద్ధంగా ఉండండి: గంగూలీ
