లబుషేన్.. ప్రస్తుతం టెస్టు క్రికెట్లో మారుమోగుతున్న పేరు. స్టార్ క్రికెటర్లు విరాట్ కోహ్లీ, స్టీవ్ స్మిత్, కేన్ విలియమ్సన్ వంటి సీనియర్లు రాజ్యమేలుతున్న సమయంలో 25 ఏళ్ల ఓ యువ క్రికెటర్ అరుదైన ఘనత సొంతం చేసుకున్నాడు. టెస్టుల్లో ఈ ఏడాది ఏకంగా వేయి పరుగులు చేసి రికార్డు సృష్టించాడు.
ఏడాది క్రితమే అరంగేట్రం..
గతేడాది అక్టోబర్‌లో పాకిస్థాన్తో జరిగిన టెస్టు సిరీస్ ద్వారా అంతర్జాతీయ క్రికెట్లో అరంగేట్రం చేశాడు లబుషేన్. అప్పట్లో పెద్దగా పేరుతెచ్చుకోని ఇతడు.. యాషెస్ సిరీస్లోని రెండో టెస్టులో స్టీవ్ స్మిత్ గాయపడటం వల్ల కాంకషన్‌ సబ్‌స్టిట్యూట్‌గా వచ్చి ఆకట్టుకున్నాడు. తొలి కాంకషన్‌ క్రికెటర్గా రికార్డునూ ఖాతాలో వేసుకున్నాడు.
అప్పటినుంచి తనదైన ఆటతీరుతో ఆ జట్టులోని స్మిత్, వార్నర్ వంటి క్రికెటర్లకు గట్టి పోటీనిస్తున్నాడు లబుషేన్. పదకొండు ఇన్నింగ్స్‌ల్లో ఈ క్రికెటర్... 59, 74, 80, 67, 11, 48, 14, 185, 162, 143, 50 పరుగులు చేశాడు. ఈ ప్రదర్శన కారణంగా టెస్టు ర్యాంకింగ్స్‌లో 110వ స్థానం నుంచి ఎనిమిదో ర్యాంక్కు చేరాడు. ఇన్ని మ్యాచ్ల్లో కలిపి మొత్తం 2 సిక్సర్లే కొట్టడం విశేషం.
బ్రాడ్మన్ తరహాలో హ్యాట్రిక్...
పెర్త్ వేదికగా న్యూజిలాండ్‌తో జరిగిన టెస్టు (డే/నైట్‌)లో అరుదైన రికార్డు సాధించాడు లబుషేన్. సుదీర్ఘ ఫార్మాట్‌లో వరుసగా మూడు శతకాలు బాదిన మూడో ఆసీస్‌ ఆటగాడిగా రికార్డు సృష్టించాడు. అతడి కంటే ముందు చార్లెస్‌(1926), బ్రాడ్మన్ (1937) మాత్రమే ఈ ఘనత సాధించారు. ఇటీవల పాక్‌తో జరిగిన సిరీస్‌లో వరుసగా 185, 162 పరుగులు చేసిన లబుషేన్.. కివీస్‌పై శతకం బాది ఈ జాబితాలో చేరాడు.
వేయి పరుగుల వీరుడు...
ఈ ఏడాది వెయ్యి టెస్టు పరుగులు పూర్తి చేసుకున్న తొలి క్రికెటర్గా లబూషేన్‌ మరో రికార్డు సాధించాడు. న్యూజిలాండ్‌తో తొలి టెస్టు రెండో ఇన్నింగ్స్లో ఈ మార్కును అందుకున్నాడు. ఈ మ్యాచ్లో 50 రన్స్ చేసి కెరీర్లో ఆరో అర్ధశతకం పూర్తి చేసుకున్నాడు. కివీస్‌తో రెండో ఇన్నింగ్స్‌కు ముందు లబుషేన్ 972 పరుగులతో ఇప్పటికే ఈ ఏడాదే తొలి స్థానంలో ఉండగా.. మరో 28 పరుగుల్ని పూర్తి చేసుకుని వేయి పరుగుల మైలురాయిని అందుకున్నాడు. ఈ ఏడాది అత్యధిక టెస్టు పరుగులు సాధించిన జాబితాలో లబూషేన్‌ అగ్రస్థానంలో కొనసాగుతుండగా.. కోహ్లీ, మయాంక్, వార్నర్ వంటి ఆటగాళ్లు ఇతడి వెనుకనే ఉన్నారు. ఆసీస్‌కే చెందిన స్టీవ్ స్టిత్‌(857) రెండో స్థానంలో ఉన్నాడు.
ఒక ఏడాదిలో వేయి టెస్టు పరుగులు పూర్తి చేసుకున్న ఆసీస్‌ క్రికెటర్ల జాబితాలో... లబుషేన్ కూడా స్థానం సంపాదించాడు. 2014 నుంచి ఒక క్యాలెండర్‌ ఇయర్‌లో వార్నర్ రెండు సార్లు వేయి పరుగులు చేస్తే... స్మిత్ నాలుగు సార్లు, వోగ్స్ ఒకసారి ఆ ఫీట్‌ సాధించాడు.
ఈ కుడిచేతి వాటం బ్యాట్స్మన్ ఇటీవల తన ప్రదర్శనకు కారణం వెల్లడించాడు. మైదానంలో కూల్గా ఉండటం వల్లే బ్యాటింగ్ బాగా చేయగలుగుతున్నట్లు చెప్పాడు. అంతేకాకుండా బబుల్గమ్ తిని ఒత్తిడిని తగ్గించుకుంటాడని చెప్పుకొచ్చాడు లబుషేన్.
