ఐపీఎల్లో అరంగేట్రం చేసేందుకు సచిన్ వారసుడు అర్జున్ సిద్ధమయ్యాడు. గత కొన్నేళ్లుగా ముంబయి ఇండియన్స్ నెట్ బౌలర్గా పనిచేసిన అర్జున్ తెందూల్కర్.. ఈ ఏడాది జరగనున్న ఐపీఎల్ వేలంలో చేరాడు. 2018లో అండర్-19 టెస్టు మ్యాచ్లకు ప్రాతినిధ్యం వహించిన అనుభవం అతడికి ఉంది.
అయితే ఈ ఐపీఎల్లో సచిన్ తనయుడి అరంగేట్రం ఉంటుందో? లేదో? తెలియాలంటే ఫిబ్రవరి 18 వరకు వేచి చూడాల్సిందే. ఈ సందర్భంగా ఐపీఎల్లో రాణించిన 5 టాప్ స్టార్ క్రికెటర్ల వారసుల గురించి తెలుసుకుందాం.
స్టువర్ట్ బిన్నీ
భారత లెజెండరీ క్రికెటర్ రోజర్ బిన్నీ తనయుడే స్టువర్ట్ బిన్నీ. ఐపీఎల్ కెరీర్లో ఇప్పటివరకు ముంబయి ఇండియన్స్, రాయల్ ఛాలెంజర్స్ బెంగుళూరు తరఫున ప్రాతినిధ్యం వహించిన ఈ ఆల్రౌండర్.. 2014లో రాజస్థాన్ రాయల్స్ జట్టులో చేరాడు.
స్టువర్ట్ బిన్నీ.. తన ఐపీఎల్ కెరీర్లో 880 పరుగులు చేయగా.. 22 వికెట్లను పడగొట్టాడు. అయితే గతేడాది జరిగిన సీజన్లో మాత్రం ఏ జట్టు అతడిని వేలంలో కొనుగోలు చేయలేదు. ఈ ఏడాది జరగనున్న ఐపీఎల్ వేలంలో అమ్ముడుపోయే అవకాశాలూ తక్కువే.
రోహన్ గావస్కర్
లెజండరీ క్రికెటర్ సునీల్ గావస్కర్ వారసుడిగా క్రికెట్లో అరంగేట్రం చేసిన రోహన్ గావస్కర్.. ఐపీఎల్-2009 సీజన్లో కోల్కతా నైట్రైడర్స్ జట్టు తరఫున కేవలం రెండు మ్యాచ్ల్లో ఆడాడు. రోహన్ ప్రస్తుతం తన తండ్రి బాటలోనే క్రికెట్ కామెంటేటర్గా వ్యవహరిస్తున్నాడు. 2004లో అంతర్జాతీయ క్రికెట్లో అడుగుపెట్టిన రోహన్.. 11 వన్డేలకు ప్రాతినిధ్యం వహించాడు.
యువరాజ్ సింగ్
ఒకప్పుడు ఐపీఎల్లో అత్యధిక పారితోషకం అందుకున్న క్రికెటర్గా యువరాజ్ సింగ్ ఘనత వహించాడు. భారత మాజీ పేసర్ యోగ్రాజ్ సింగ్ కుమారుడే యువరాజ్ సింగ్. ఐపీఎల్లో కింగ్స్ ఎలెవన్ పంజాబ్ జట్టు తరఫున కెరీర్ ప్రారంభించి ఆ తర్వాత పుణె వారియర్స్ టీమ్లో చేరాడు. 2014 సీజన్లో యువరాజ్ను రాయల్ ఛాలెంజర్స్ బెంగుళూరు కొనుగోలు చేయగా.. 2016లో రూ.16 కోట్లకు దిల్లీ క్యాపిటల్స్ సొంతం చేసుకుంది.
2016-17 సీజన్లలో సన్రైజర్స్ హైదరాబాద్ జట్టులో చేరగా.. 2018లో తిరిగి కింగ్స్ ఎలెవన్ పంజాబ్ టీమ్తో కలిశాడు. చివరిగా రిటైర్మెంట్కు ముందు 2019లో ముంబయి ఇండియన్స్ జట్టుకు ప్రాతినిధ్యం వహించాడు.
షాన్ మార్ష్
ఆస్ట్రేలియా లెజెండ్ క్రికెటర్ జియోఫ్ మార్ష్ వారసుడే ఈ షాన్ మార్ష్. ఐపీఎల్ ఆరంభ సీజన్లో అద్భుతమైన ప్రదర్శనతో 616 పరుగులు నమోదు చేసి 11 వికెట్లు పడగొట్టాడు. ఈ సీజన్లో సెంచరీతోనూ షాన్ మార్ష్ అలరించాడు. ఐపీఎల్ కెరీర్లో కింగ్స్ ఎలెవన్ పంజాబ్ ఫ్రాంచైజీ తరఫున ప్రాతినిధ్యం వహించి.. మొత్తంగా 2477 పరుగులను రాబట్టాడు. అయితే షాన్ ఇప్పుడు ఐపీఎల్లో ఆడడం లేదు.
మిచెల్ మార్ష్
ఆస్ట్రేలియా క్రికెటర్ షాన్ మార్ష్ సోదరుడు, జియోఫ్ మార్ష్ చిన్న కుమారుడు మిచెల్ మార్ష్. ఐపీఎల్ 2010 సీజన్లోనే ఈ సోదరులిద్దరూ ఐపీఎల్లో అరంగేట్రం చేసినా.. మిచెల్ మార్ష్కు ఎక్కువ అవకాశాలు దక్కలేదు. ఐపీఎల్లో మిచెల్ ఆడిన మ్యాచ్లు కేవలం 21. కొన్ని కారణాల వల్ల 2017 నుంచి 2019 వరకు ఐపీఎల్కు అందుబాటులో లేడు.
గతేడాది జరిగిన ఐపీఎల్ సీజన్లో సన్రైజర్స్ హైదరాబాద్ తరఫున ప్రాతినిధ్యం వహించి.. 225 పరుగులు చేసి.. 20 వికెట్లను పడగొట్టాడు. దీంతో ఈ ఏడాది సీజన్కు మిచెల్ మార్ష్ను ఆ జట్టు అట్టిపెట్టుకుంది. ఐపీఎల్ కెరీర్లో మిచెల్.. రైజింగ్ పుణె సూపర్జైయింట్స్, డెక్కన్ ఛార్జర్స్, పుణె వారియర్స్ జట్లలో ఆడాడు.
ఇదీ చూడండి: చెపాక్లో భారత్దే హవా.. మరి ఇప్పుడు ఏం చేస్తుందో?
