న్యూజిలాండ్తో జరిగిన ప్రాక్టీస్ మ్యాచ్లో భారత్ ఘోరపరాజయం పాలైంది. మొదట బ్యాటింగ్ చేసిన టీమిండియా 39.2 ఓవర్లలో 179 పరుగులే చేసింది. బ్యాట్స్మెన్లో జడేజా మినహా ఎవరూ రాణించలేదు. హార్దిక్ పాండ్య ఫర్వాలేదనిపించాడు.
ఈ మ్యాచ్లో ప్రయోగాలకు ఎక్కువ ప్రాధాన్యాన్నిచ్చింది టీమిండియా. హార్దిక్ పాండ్యను ఐదో స్థానంలో బ్యాటింగ్కు పంపింది. మొదటి నాలుగు ఓవర్లలో కేవలం రెండు పరుగులే ఇచ్చి ఆకట్టుకున్న బుమ్రాకు ఆ తర్వాత బంతిని ఇవ్వలేదు. ఇవి కొంత వరకు సత్ఫలితాలనిచ్చినా మ్యాచ్ చేజారడం నిరాశ కలిగించింది. ఈ మ్యాచ్ ద్వారా టీమిండియా దృష్టిసారించాల్సిన అంశాలు చాలా ఉన్నాయి.
లెఫ్టార్మ్ పేసర్తో ఇబ్బందులు
2017 నుంచి లెఫ్టార్మ్ పేసర్ బౌలింగ్లో రోహిత్ సగటు 20కి దిగువగానే ఉంది. ప్రాక్టీస్ మ్యాచ్లోనూ బౌల్ట్ బౌలింగ్లో వికెట్ల ముందు దొరికిపోయాడు. బౌల్ట్ బౌలింగ్లోనే కీపర్కు క్యాచ్ ఇచ్చి వెనుదిరిగాడు ధావన్. కార్డిఫ్లో బంగ్లాదేశ్తో జరిగే తదుపరి ప్రాక్టీస్ మ్యాచ్లోనైనా ఈ విషయంపై టీమిండియా దృష్టిపెట్టాలి. బంగ్లా లెఫ్టార్మ్ పేసర్ ముస్తాఫిజుర్ రెహ్మాన్ను కోహ్లి సేన ఎలా ఎదుర్కొంటుందో అనేది ఆసక్తికరం. భారత ప్రపంచకప్ జట్టులో లెఫ్టార్మ్ పేసర్కు చోటు దక్కలేదు. ఖలీల్ అహ్మద్ రూపంలో నెట్ బౌలర్ ఉన్నాడు. నెట్స్లో అతడి బౌలింగ్లో భారత బ్యాట్స్మెన్ ఎక్కువ ప్రాక్టీస్ చేయాలంటున్నారు క్రికెట్ విశ్లేషకులు.
నాలుగో స్థానం
టీమిండియాకు తలనొప్పిగా మారిన సమస్య నాలుగో స్థానంలో బ్యాటింగ్. ఆల్రౌండర్ విజయ్ శంకర్ గాయంతో మొదటి ప్రాక్టీస్ మ్యాచ్కు దూరమవగా... రాహుల్ ఈ స్థానంలో బ్యాటింగ్కు దిగి విఫలమయ్యాడు. జూన్ 5న జరగబోయే మొదటి మ్యాచ్కు ముందు ఈ సమస్యను అధిగమించాలని చూస్తోంది జట్టు.
టీ20 స్పెషలిస్టులు
ఐపీఎల్లో అదరగొట్టి ప్రపంచకప్ జట్టులో స్థానం సంపాదించిన రాహుల్, కార్తీక్... కివీస్తో జరిగిన మ్యాచ్లో విఫలమయ్యారు. బంగ్లాదేశ్లో జరిగే మ్యాచ్లో అయినా వారు ఫామ్లోకి రావాల్సి ఉంది.
జడేజా లేక కుల్దీప్
మొదటి ప్రాక్టీస్ మ్యాచ్లో అర్ధశతకంతో రాణించిన జడేజాకు రానున్న మ్యాచ్లో చోటు లభించడం ఖాయంగా కనిపిస్తోంది. బ్యాటింగ్తో పాటు బౌలింగ్లోనూ ఆకట్టుకున్నాడు జడేజా. 71 పరుగులతో రాణించిన టేలర్ వికెట్ తీశాడు. ఐపీఎల్లో విఫలమైన కుల్దీప్.. కివీస్పై అంత ప్రభావం చూపించలేకపోయాడు. 8.1 ఓవర్లలో వికెట్ ఏమీ తీయకుండా 44 పరుగులు సమర్పించుకున్నాడు.
ఇవీ చూడండి.. 'మోసగాడా వెళ్లిపో'- వార్నర్, స్మిత్కు చేదు అనుభవం
