భారత జట్టు మూడోసారి ప్రపంచకప్ గెలవాలన్న పట్టుదలతో ఇంగ్లాండ్లో అడుగుపెట్టింది. మెగాటోర్నీలో మొదటిసారి అత్యుత్తమ బౌలింగ్ దళంతో బరిలోకి దిగబోతోంది. బ్యాటింగ్లో మాత్రం టాప్ ఆర్డర్పైనే అందరి దృష్టి నెలకొంది.
రోహిత్ శర్మ, శిఖర్ ధావన్, విరాట్ కోహ్లీలు సత్తాచాటాలని భావిస్తున్నారు అభిమానులు. పరిమిత ఓవర్ల క్రికెట్లో వీరు ముగ్గురు జట్టుకు వెన్నెముకగా మారారు. వీరి ఫామ్, ప్రదర్శనే టీమిండియాకు ట్రోఫీని అందించగలదని విశ్లేషకులు అభిప్రాయం. స్టాండ్బై ఓపెనర్గా ఉన్న రాహుల్ కూడా అవసరమున్న సమయంలో రాణించగలడు.
అత్యుత్తమ ఓపెనింగ్ జోడి
ప్రస్తుతం భారత ఓపెనర్లు ధావన్, రోహిత్ ప్రపంచంలోని మేటి బ్యాట్స్మెన్గా గుర్తింపు పొందారు. రోహిత్ కుదురుకుంటే భారీ ఇన్నింగ్స్ ఆడగలడు. హిట్మ్యాన్ అండతో మొదటినుంచే ప్రత్యర్థిపై దాడి చేయగలడు ధావన్. పిచ్ను, పరిస్థితుల్ని బట్టి మంచి అవగాహనతో స్కోర్ బోర్డును పరుగులు పెట్టించగలరు. 2018లో వీరిద్దరూ కలిసి 4,586 పరుగులు సాధించారు.
రన్ మెషీన్ కోహ్లీ
మూడో స్థానంలో బ్యాటింగ్కు వచ్చే కోహ్లీ సుదీర్ఘ ఇన్నింగ్స్లు ఆడటంలో దిట్ట. జట్టు కష్టాల్లో ఉన్నపుడు, ఒత్తిడి సమయంలో మంచి ప్రదర్శన చేయగలడు. అవలీలగా శతకాలు సాధిస్తూ ప్రపంచ క్రికెట్లో అగ్రస్థాయి బ్యాట్స్మన్గా ఎదిగాడు. ఛేదనలో మాస్టర్గా పేరొందాడు. ఓపెనర్లకు తోడు కోహ్లీ చక్కని ఇన్నింగ్స్ ఆడితే టీమిండియాకు తిరుగుండదు.
2015 నుంచి చూసుకుంటే టీమిండియా వీరి ముగ్గురిపైనే ఎక్కువగా ఆధారపడింది. భారీ భాగస్వామ్యాలు నెలకొల్పుతూ జట్టుకు విజయాలను అందించారు. ప్రస్తుతం ఇంగ్లాండ్ పిచ్లు బ్యాట్స్మెన్కు అనుకూలించేలా ఉన్నాయి. భారత టాప్ ఆర్డర్ త్రయం మంచి ప్రదర్శన చేస్తే ప్రపంచకప్ ట్రోఫీ భారత్దే అని అంటున్నారు క్రికెట్ పండితులు.
ఇవీ చూడండి.. WC19: '350 కాదు... 250 మంచి స్కోరే'
