కరేబియన్ ప్రీమియర్ లీగ్ను(CPL) అనుకున్న షెడ్యూల్ ప్రకారం కన్నా వారం లేదా పదిరోజుల పాటు ముందస్తుగా నిర్వహించాలని వెస్టిండీస్ క్రికెట్ బోర్డుకు బీసీసీఐ(BCCI) విజ్ఞప్తి చేసింది. ఈ విషయాన్ని మన బోర్డు అధికారి ఒకరు తెలిపారు. ప్రస్తుతం దీని గురించి ఇరుదేశాల బోర్డుల మధ్య చర్చలు జరుగుతున్నాయని వెల్లడించారు.
షెడ్యూల్ ప్రకారం సీపీఎల్, ఆగస్టు 28 నుంచి సెప్టెంబరు 19వరకు జరగాలి. మరోవైపు యూఏఈలో జరిగే ఐపీఎల్(IPL) రెండో దశ సెప్టెంబరు 18 నుంచి అక్టోబరు 10వరకు నిర్వహించాలని బీసీసీఐ భావిస్తోంది. కరోనా నిబంధనల ప్రకారం ఆటగాళ్లంతా దుబాయ్ చేరుకోగానే మూడు రోజులు తప్పనిసరి క్వారంటైన్లో ఉండాలి. ఒకవేళ ఇదే సమయానికి సీపీఎల్ ఉంటే అందులో పాల్గొన్న ఆటగాళ్లు ఐపీఎల్ ప్రారంభ మ్యాచ్లకు దూరమవ్వాల్సి వస్తుంది. అందుకే కరేబియన్ లీగ్ త్వరగా ముగిసేలా రీషెడ్యూల్ చేయాలన్న ప్రతిపాదనను వెస్టిండీస్ బోర్డు ముందు బీసీసీఐ ఉంచింది.
"వెస్టిండీస్ క్రికెట్ బోర్డుతో చర్చలు జరపుతున్నాం. సీపీఎల్ త్వరగా ముగిస్తే, అక్కడి బబుల్ నుంచి ఐపీఎల్ బుడగలోకి మారడం, మూడు రోజుల క్వారంటైన్ పూర్తి చేయడం ఆటగాళ్లకు సులువు అవుతుంది."
-బీసీసీఐ అధికారి
ఆల్రౌండర్ కీరన్ పొలార్డ్, క్రిస్గేల్(Gayle), డ్వేన్ బ్రావో, సిమ్రాన్ హెట్మెయర్, జాసన్ హోల్డర్, నికోలస్ పూరన్, ఫాబియన్ అలెన్, కీమో పాల్, సునీల్ నరైన్, త్రినిదాద్, బ్రెండన్ మెక్ కల్లమ్ సీపీఎల్లో పాల్గొననున్నారు. ఒకవేళ వెస్టిండీస్ బోర్డు.. బీసీసీఐ ప్రతిపాదనను అంగీకరించకపోయినా ఐపీఎల్ సెప్టెంబరు 18 నుంచి జరిగినా ఈ ఆటగాళ్లంతా కొన్ని ఐపీఎల్ మ్యాచ్లకు దూరమవ్వక తప్పదు.
ఇదీ చూడండి:సచిన్ కెరీర్లో ఆ రెండు విషయాలు కలగానే..
