బాలీవుడ్ బుల్లితెర కార్యక్రమాలతో పాటు పలు సినిమాల నిర్మాణ బాధ్యతలు చేపట్టింది ఏక్తాకపూర్. బుల్లితెరలో ప్రసారమయ్యే 'నాగిని' ధారావాహికకు ఆమె నిర్మాతగా వ్యవహరిస్తోంది. ప్రస్తుతం దీనికి సంబంధించిన నాలుగో సీజన్ టెలివిజన్లో ప్రసారం అవుతోంది. గతంలో ఈ కథాంశంతో వెండితెరపై ఆమె సినిమా తీయాలనుకుందట. అయితే కొన్ని కారణాల వల్ల ఆ ప్రాజెక్టు ముందుకు సాగలేదని చెప్పింది.
"డర్టీ పిక్చర్ సినిమా తర్వాత 'నాగిని' ధారావాహికను వెండితెరపై తీసుకొచ్చే క్రమంలో కత్రినా కైఫ్, ప్రియాంక చోప్రాను సంప్రదించాం. కత్రినాకు జానపద చిత్రాలపై ఆసక్తి లేకపోవడం వల్ల దీన్ని సున్నితంగా తిరస్కరించింది. ప్రియాంక చోప్రా అంగీకారం తెలిపినా.. ఆ సమయంలో హాలీవుడ్ చిత్రంతో బిజీగా ఉండటం వల్ల అది కార్యరూపం దాల్చలేదు. స్టార్ హీరోలతో చిత్రాన్ని నిర్మించాలని ఎవరికైనా ఉంటుంది. కానీ, నాకు ప్రియాంక.. కత్రినా లాంటి హీరోయిన్లతో సినిమా తెరకెక్కించాలని ఉంది."
- ఏక్తా కపూర్, బాలీవుడ్ నిర్మాత
నిర్మాతగా అటు బుల్లితెరతోపాటు వెండితెరపైనా తన కెరీర్ను అన్ని విధాలుగా సమన్వయం చేసుకోవాలనుకుంటోంది ఏక్తా కపూర్. దీంతో పాటు కొన్ని వెబ్సిరీస్లనూ నిర్మిస్తోంది. ప్రస్తుతం 'ఏక్ విలన్' సీక్వెల్కు సహ నిర్మాతగా వ్యవహరిస్తోంది.
ఇదీ చూడండి.. జనతా కర్ఫ్యూ ఉల్లంఘన.. మండిపడ్డ విశ్వక్సేన్
