బాలీవుడ్లో నిలదొక్కుకోవడం అంటే సాధారణ విషయం కాదు. అభిమానులకు నచ్చేలా సినిమా తీస్తూనే, ఇతర హీరోల పోటీని తట్టుకుంటూ నెగ్గుకురావాలి. ఇప్పుడున్న కొంతమంది స్టార్స్ ఇలానే చాలా కష్టాలు పడితే గానీ ఈ స్థాయికి రాలేకపోయారు. ఇప్పుడు కోట్లలో రెమ్యునరేషన్ తీసుకుంటున్న ఈ తారలు.. తొలి జీతం వందల్లో తీసుకున్నారంటే మీరు నమ్మగలరా? అవును మీరు విన్నది నిజమే. ఈ నేపథ్యంలోనే అక్షయ్ కుమార్, అమితాబ్ బచ్చన్, షారుక్ ఖాన్, ఆమిర్ఖాన్, ప్రియాంకా చోప్రా.. తొలి జీతం ఎంత తీసుకున్నారు? ఇప్పుడెంత తీసుకుంటున్నారో చూద్దాం.
అక్షయ్ కుమార్
హీరోగా ఏడాదికి నాలుగు సినిమాలకు తగ్గకుండా చేస్తున్న అక్షయ్ కుమార్.. బాలీవుడ్లో అత్యధిక రెమ్యునరేషన్ తీసుకుంటున్న హీరోల్లో ఒకరు. ప్రస్తుతం ఆనంద్ ఎల్ రాయ్ దర్శకత్వంలో చేస్తున్న సినిమా కోసం రూ.120 కోట్లు అందుకుంటున్నారు. అయితే నటుడు కాకముందు బ్యాంకాక్లో చెఫ్, వెయిటర్గా పనిచేశారు అక్షయ్. నెలకు రూ.1500 జీతం మాత్రమే తీసుకున్నారు.
అమితాబ్ బచ్చన్
భారతీయ సినిమా.. లవ్స్టోరీలు, రొమాంటిక్ హీరోలతో ఉన్న కాలంలో 'జంజీర్'తో యాంగ్రీ యంగ్ మ్యాన్గా ఎంట్రీ ఇచ్చారు బిగ్బీ అమితాబ్ బచ్చన్. నటన, గానం, రచన, డ్యాన్స్.. ఇలా ఏదైనా సరే తాను రెడీ అంటూ ముందుకొచ్చారు. తనకు ఏ పాత్ర ఇచ్చినా సరే, అందుకు తగ్గట్లుగా తనను తాను మార్చుకుని వావ్ అనిపించారు. అయితే వీటి కంటే ముందు కోల్కతాలోని షా& వాల్ష్ కంపెనీలో రూ.500 జీతానికి ఎగ్జిక్యూటివ్గా అమితాబ్ పనిచేసినట్లు టైమ్స్ ఆఫ్ ఇండియా గతంలో పేర్కొంది. ఫ్రీప్రెస్ జర్నల్ తెలిపిన ప్రకారం బిగ్బీ ఇప్పుడు ఒక్కో సినిమాకు రూ.18-20 కోట్లు తీసుకుంటున్నారు.
ఆమిర్ఖాన్
బాలీవుడ్లో మిస్టర్ ఫర్ఫెక్షనిస్ట్ అంటే గుర్తొచ్చే పేరు ఆమిర్ఖాన్. బయోపిక్లు, సందేశాత్మక చిత్రాల్లో నటిస్తూ అలరిస్తున్న ఆయన.. నటుడిగా నెలకు రూ.1000 లెక్కన తొలి జీతం అందుకున్నారు. 'ఖయామత్ సే ఖయామత్ తక్' కోసం దాదాపు ఏడాది పాటు పనిచేసిన ఆమిర్.. రూ.11 వేలు తీసుకున్నారు. ఈ విషయాన్ని ఆయన ఫిల్మ్ఫేర్కు ఇచ్చిన ఇంటర్వ్యూలో వెల్లడించారు.
షారుక్ఖాన్
బాలీవుడ్లోనే కాకుండా ప్రపంచవ్యాప్తంగా ఎంతోమంది అభిమానుల్ని సంపాదించుకున్న కింగ్ షారుక్ఖాన్.. హీరోగా, నిర్మాతగా, పారిశ్రామికవేత్తగా సత్తా చాటుతున్నారు. అయితే నటుడిగా కెరీర్ మొదలుపెట్టకముందు 'పంకజ్ ఉదాస్ కన్సర్ట్'లో ఉషార్గా(దారి చూపేవాడు) పనిచేశారు షారుక్. ఈ క్రమంలో తొలి జీతంగా రూ.50 అందుకున్నారు. ఇప్పుడు మాత్రం తన కొత్త సినిమా కోసం రూ.100 కోట్లు తీసుకుంటున్నారట.
ప్రియాంకా చోప్రా
బాలీవుడ్లో సాధారణ నటిగా కెరీర్ ప్రారంభించిన ప్రియాంకా చోప్రా.. ప్రస్తుతం హాలీవుడ్లో సినిమాలు, టీవీ సిరీస్లు చేస్తూ బిజీగా మారిపోయింది. 2000లో మిస్ వరల్డ్ కిరీటం గెల్చుకున్న తర్వాత చేసిన తొలి ప్రాజెక్టుకు రూ.5000 జీతంగా అందుకుంది ప్రియాంక. ఈ ప్రముఖ ఛానెల్ కథనం ప్రకారం ఇన్స్టాలో ఒక్క పోస్టు పెట్టేందుకు రూ.1.80 కోట్లు తీసుకుంటున్న ప్రియాంక.. ఒక్కో సినిమాకు రూ.22 కోట్ల రెమ్యునరేషన్ అందుకుంటోంది.
