'ధోని: ది అన్‌టోల్డ్‌ స్టోరీ' చిత్రంతో దేశవ్యాప్తంగా గుర్తింపు తెచ్చుకున్న హీరో సుశాంత్‌సింగ్‌ రాజ్పుత్ ఆత్మహత్య చేసుకున్నారు. ముంబయిలోని తన నివాసంలో ఉరివేసుకుని సూసైడ్ చేసుకున్నట్లు పోలీసులు తెలిపారు. ఆయన ఆత్మహత్యకు గల కారణాలు తెలియాల్సి ఉంది.
ఒత్తిడి ఉందా..?
సుశాంత్ సింగ్ రాజ్పుత్ దగ్గర మేనేజర్గా పనిచేసిన దిశా శాలిన్.. జూన్ 9న ఆత్మహత్య చేసుకుంది. ముంబయిలో తాను ఉంటున్న అపార్ట్మెంట్ 14వ అంతస్థు నుంచి దూకింది. తీవ్రంగా గాయపడిన ఆమెను.. సమీప బోరివాలీ ఆస్పత్రికి తీసుకెళ్లగా, ఆమె మృతి చెందినట్లు వైద్యులు ధ్రువీకరించారు. ఈమె మరణంపై పోలీసుల దర్యాప్తు జరుగుతోంది. ఆమె బలవన్మరణానికి పాల్పడ్డ ఆరు రోజుల్లోనే ఈ స్టార్ హీరో ఆత్మహత్య చేసుకోవడం దిగ్భ్రాంతికి గురిచేస్తోంది. ఈ సమయంలో ఏం జరిగింది? ఈ హీరో ఎవరి నుంచి అయినా ఒత్తిడి ఎదుర్కొన్నారా? వంటి అనుమానాలు వ్యక్తమవుతున్నాయి.
ఆ సినిమాతో హిట్...
సుశాంత్ సింగ్ తొలుత టెలివిజన్‌ నటుడిగా కెరీర్‌ను ఆరంభించారు. 2008లో స్టార్ ప్లస్లోని ఓ సీరియల్ ద్వారా బుల్లితెరకు పరిచయం అయ్యారు. ఆ సీరియల్ మంచి విజయం సాధించగా.. అతడి పేరు మారు మోగిపోయింది. ఆ తర్వాత 2013లో బాలీవుడ్ చిత్రం 'కై పో చీ'తో వెండితెరకు పరిచయమైన సుశాంత్ వరుస చిత్రాలు చేస్తూ ఆకట్టుకున్నారు. 'శుద్ధ్‌ దేశీ రొమాన్స్‌', 'పీకే','డిటెక్టివ్‌ బ్యోమ్కేశ్ బక్షి' తదితర చిత్రాల్లో నటించారు. టీమ్‌ఇండియా మాజీ కెప్టెన్‌, మిస్టర్‌ కూల్‌ ఎం.ఎస్‌.ధోనీ జీవిత కథ ఆధారంగా తెరకెక్కిన 'ఎం.ఎస్‌.ధోని: ది అన్‌టోల్డ్‌ స్టోరీ' చిత్రంతో ఒక్కసారిగా యావత్‌ దేశం దృష్టిని ఆకర్షించారు. నీరజ్‌ పాండే దర్శకత్వం వహించిన ఈ చిత్రం బాక్సాఫీస్‌ వద్ద మంచి విజయాన్ని అందుకుంది. ఈ చిత్రానికిగానూ ఫిలింఫేర్ అవార్డునూ అందుకున్నారు.
ఆ తర్వాత సుశాంత్ 'రాబ్తా', 'వెల్‌కమ్‌ న్యూయార్క్‌', 'కేదార్‌నాథ్‌', 'సంచీరియా', 'చిచ్చోరె', 'డ్రైవ్‌' చిత్రాల్లో నటించారు. ప్రస్తుతం ఆయన కథానాయకుడిగా ‘దిల్‌ బెచరా’ చిత్రీకరణ దశలో ఉంది.
