బాలీవుడ్ సూపర్స్టార్ షారుక్ ఖాన్ హీరోగా తమిళ దర్శకుడు అట్లీ ఓ సినిమా తెరకెక్కించబోతున్నట్లు సమాచారం. ఇటీవలే ఈ సినిమాకు 'సంకీ' అనే పేరు పెట్టినట్లు వార్తలు వినిపించాయి. దీనిపై కింగ్ ఖాన్ పుట్టినరోజైన నవంబర్ 2న చిత్రబృందం స్పష్టత ఇవ్వనున్నట్లు తెలుస్తోంది.
ఇప్పుడు ఈ చిత్రంలో షారుక్ సరసన ముద్దుగుమ్మ దీపికా పదుకొణె కనిపించనున్నట్లు సినీ వర్గాల్లో టాక్. ఇటీవలే నిర్మాతలు ఆమెకు కథ వినిపించగా గ్రీన్ సిగ్నల్ ఇచ్చిందట. వచ్చే ఏడాది ప్రారంభంలో షూటింగ్ మొదలుకానున్నట్లు తెలుస్తోంది. మరి ఈ విషయంపై స్పష్టత రావాలంటే అధికారిక ప్రకటన వచ్చే వరకు వేచి చూడాల్సిందే.
షారుక్, దీపిక కలయికలో గతంలో అనేక విజయవంతమైన చిత్రాలు వచ్చాయి. అన్ని సినిమాలు బాక్సాఫీస్ వద్ద సూపర్ హిట్గా నిలవడం విశేషం. ఈ క్రమంలోనే మరో సారి ఈ జోడీ ప్రేక్షకులను అలరించేందుకు సిద్ధమవుతున్నట్లు కనిపిస్తోంది.
కాగా షారుక్ చివరగా 'జీరో' చిత్రంతో రాగా ఆ సినిమా బాక్సాఫీసు వద్ద నిరాశపరిచింది. దీంతో సరికొత్త కథతో అభిమానులను అలరించాలనే ఉద్దేశంతో ఇప్పటి వరకు 30 కథలను తిరస్కరించాడట షారుక్. చివరకు ముగ్గురు దర్శకులకు ఓకే చెప్పినట్లు తెలుస్తోంది. వారిలో రాజ్‌కుమార్‌ హిరాణీ, రాజ్‌ - డీకే, అట్లీల పేర్లు వినిపిస్తున్నాయి.
