బాలీవుడ్ నటుడు సుశాంత్ ఆత్మహత్య కేసులో ఆరోపణలు ఎదుర్కొంటున్న నటి రియా.. ఎక్కడికి పారిపోలేదని క్లారిటీ ఇచ్చారు ఆమె తరఫు న్యాయవాది సతీశ్ మాన్షిండే. గత మూడు రోజులుగా రియా, తన కుటుంబం అజ్ఞాతంలోకి వెళ్లినట్లు వార్తలు వచ్చాయి.
"రియా చక్రవర్తి కనిపించట్లేదని బిహార్ పోలీసుల వాదించడం సరైనది కాదు. ఆమె ముంబయి పోలీసులు పిలిచినప్పుడు విచారణకు హాజరై వారికి సహకరిస్తోంది. ఈరోజు వరకు బిహార్ పోలీసుల నుంచి ఎలాంటి నోటీసులు, సమన్లు కానీ రియాకు రాలేదు. ప్రస్తుతం వారి అధికార పరిధిలో దర్యాప్తు చేయడానికి వీలులేదు.కేసు విచారణను పాట్నా నుంచి ముంబయికి తరలించాలని ఆమె సుప్రీం కోర్టులో పిటిషన్ వేసింది" అని సతీశ్ తెలిపారు.
రియా తన కుటుంబంతో కలిసి రాత్రికి రాత్రే ఇంటిని వదిలి పరారైనట్లు పలు వార్తలు వచ్చాయి. సుశాంత్ సింగ్ రాజ్పుత్ ఆత్మహత్యకు కారకులుగా పేర్కొంటూ.. రియా సహా మరో ఆరుగురిపై పాట్నాలో కేసు నమోదు చేశారు సుశాంత్ తండ్రి కేకే సింగ్. అనంతరం ఆమె కనపించకపోవడం చర్చనీయాంశమైంది. అయితే తనకు దేవుడు, న్యాయవ్యవస్థపై నమ్మకముందని సోషల్ మీడియా వేదికగా ఓ వీడియోను పోస్టు చేసింది రియా.
కేసును పాట్నా నుంచి ముంబయికి ట్రాన్స్ఫర్ చేయాలని ఇప్పటికే సుప్రీంలో పిటిషన్ వేసింది రియా చక్రవర్తి. అయితే పాట్నాలోనే కేసు కొనసాగాలని కౌంటర్ పిటిషన్ వేశారు కేకే సింగ్ తరఫు న్యాయవాది వికాశ్ సింగ్. ఇది ఆగస్టు 5న అత్యున్నత న్యాయస్థానంలో విచారణకు రానుంది.
జూన్ 14న ముంబయి బాంద్రాలోని తన ఇంట్లో ఉరివేసుకున్నాడు హీరో సుశాంత్ సింగ్ రాజ్పుత్. శవపరీక్ష అనంతరం నటుడిది ఆత్మహత్యగా వైద్యులు ధ్రువీకరించారు.
