రంగోలీ చందేల్.... బాలీవుడ్ 'క్వీన్' కంగనా రనౌత్ సోదరిగా ఆమె సుపరిచితం. కంగనకు అండగా ఉండడమే కాదు, ఆమెను ఎవరైనా ఏదైనా అంటే సోషల్‌మీడియా వేదికగా వారందరిపై ఆగ్రహాన్ని వ్యక్తపరుస్తుంటుంది. తాజాగా రంగోలీ తన చెల్లెలు కంగనతో కలిసి దిగిన ఫొటోలను ట్విటర్‌ వేదికగా అభిమానులతో పంచుకుంది. ఆ ఫొటోలు చూసిన నెటిజన్లు చిన్నప్పుడు కంగన కంటే నువ్వే అందంగా ఉన్నావ్‌ అని కామెంట్లు పెట్టారు. ఈ సందర్భంగా ఆమె ఓ విషాదకర ఘటనను గుర్తుచేసుకుంది.
"ఈ ఫొటోలు అప్పటి జ్ఞాపకాలను గుర్తు చేస్తున్నాయి. ఇది మా కళాశాల వార్షికోత్సవంలో తీసుకున్న ఫొటో. వార్షికోత్సవం తర్వాత రోజే నన్ను ప్రేమిస్తున్నానని వెంటపడిన ఓ అబ్బాయి.. నేను అంగీకరించలేదని లీటర్‌ యాసిడ్‌తో నాపై దాడి చేశాడు. నా చెల్లెలు కంగనా రనౌత్‌ను కొట్టాడు. తను చనిపోయిందేమో అనుకున్నాం. ఆ ప్రమాదం నుంచి నేను కోలుకోవడానికి చాలా సమయం పట్టింది. అప్పుడు నాకు అనిపించింది. ఇందుకోసమేనా మన తల్లిదండ్రులు మనకి జన్మనిచ్చింది. ఇలాంటి దుష్టశక్తుల మీద పోరాడాలని నిర్ణయించుకున్నాను. ఆ దాడిలో నా ఎడమవైపు శరీరం చాలా వరకు కాలిపోయింది. 5 సంవత్సరాల పాటు డాక్టర్లు నాకు 54 సర్జరీలు చేశారు. పూర్తిగా కాలిపోయిన నా చెవిని డాక్టర్లు సైతం సరిచేయలేకపోయారు".
--రంగోలీ, కంగనా సోదరి
పిల్లలు పుట్టిన సమయంలో చాలా ఇబ్బందులు ఎదుర్కొన్నట్లు రంగోలీ వెల్లడించింది. ఇప్పటికి ఆమె తన మెడను పూర్తిగా వంచలేదని చెప్పింది.
" నా మీద యాసిడ్ దాడి చేసిన వాళ్లు మాత్రం జైలు నుంచి బయటకు వచ్చి సంతోషంగా జీవిస్తున్నారు. నేను కూడా ఆ కేసు గురించి పట్టించుకోవడం మానేశాను. అలాంటి వారికి ఎందుకు ఉరి శిక్ష వేయరు?. కంగనారనౌత్‌ ఆ ప్రమాదం గురించి మర్చిపోయేలా చేసింది" అని తన జీవితంలో జరిగిన బాధకరమైన సంఘటనను గురించి నెటిజన్లకు చెప్పింది రంగోలీ.
