ఊర్లలో గాంధీ నగర్, నెహ్రూ కాలనీ అంటూ ప్రముఖుల పేర్లు పెట్టుకోవడం కొత్తేమి కాదు. అయితే ఓ సినిమా గౌరవార్థం ఆ చిత్ర దర్శకుడి పేరునే తమ ప్రాంతం పేరుగా పెట్టుకున్నారన్న విషయం తెలిస్తే మీరు ఆశ్చర్యపోవడం ఖాయం. భారతీయ సినీచరిత్రలో క్లాసిక్స్లో అగ్రస్థానం సంపాందించుకున్న చిత్రం 'షోలే'. అమితాబ్ బచ్చన్, ధర్మేంద్ర, హేమమాలిని లాంటి హేమాహేమీలు నటించిన ఈ సినిమాలోని పాత్రలు ఇప్పటికీ ఎంతోమంది మనుసుల్లో నిలిచిపోయాయి. ముఖ్యంగా ప్రతినాయక పాత్ర 'గబ్బర్సింగ్' గురించి నేటికీ మాట్లాడుకుంటూనే ఉంటారు.
ఈ చిత్రాన్ని బెంగళూరులోని రామ్నగరం పట్టణం పరిసర ప్రాంతాల్లో చిత్రీకరించారు. అక్కడ భారీగా ఉండే గ్రానైట్ రాళ్లు ఎక్కువగా కనిపిస్తుంటాయి. అలాంటి ఓ ప్రాంతాన్నే గబ్బర్సింగ్ దాక్కుని ఉండే డెన్గా చూపించారు. షూటింగ్ జరుగుతున్నప్పుడు ఆ ఊరి ప్రజలకు చిత్రబృందంతో మంచి అనుబంధం ఏర్పడింది. తమ ఊరిలో రూపొందిన ఆ చిత్రం మరుపురాని విజయం సాధించడం వల్ల వారు మురిసిపోయారు. అప్పుడే 'షోలే'కు గౌరవసూచకంగా ఆ చిత్ర దర్శకుడు రమేశ్ సిప్పీ పేరు మీదుగా తమ ఊరిలోని ఓ ప్రాంతానికి సిప్పీ నగర్ అని పేరు పెట్టుకున్నారు.
