ప్రముఖ నటుడు మాధవన్ గౌరవ డాక్టరేట్ అందుకున్నారు. ఆర్ట్స్, సినిమాల్లో చూపిన ప్రతిభకుగానూ డీవై పాటిల్ ఎడ్యకేషన్ సొసైటీ, కొల్హాపుర్.. బుధవారం ఈ పురస్కారం ఆయనకు అందజేసింది. ఈ విషయాన్ని సోషల్ మీడియాలో పంచుకున్న మాధవన్ ఆనందం వ్యక్తం చేశారు.
"ఈ సత్కారం దక్కడం గౌరవంగా భావిస్తున్నాను. సరికొత్త ప్రాజెక్టులు, వినూత్న పాత్రల్ని ఎంపిక చేసుకోవడంలో ఈ డాక్టరేట్ నాకు తోడ్పాటును అందిస్తుందని అనుకుంటున్నాను" -ఇన్స్టాలో మాధవన్
90ల్లో వచ్చిన మణిరత్నం 'అలైపాయతే'(తెలుగులో 'సఖి') సినిమాతో మాధవన్ చాలా గుర్తింపు తెచ్చుకున్నారు. ఆ తర్వాత కూడా తెలుగు, తమిళ, హిందీ చిత్రాల్లో నటించి పేరు సంపాదించారు.
2018లో వచ్చిన 'బ్రీత్' వెబ్ సిరీస్తో డిజిటల్ తెరంగేట్రం చేశారు. ఇటీవల 'మారా'తో ప్రేక్షకుల్ని పలకరించారు. దుల్కర్ సల్మాన్ 'చార్లీ' సినిమాకు రీమేక్గా దీనిని తెరకెక్కించారు. ప్రస్తుతం తొలిసారి దర్శకుడిగా 'రాకెట్రీ' చిత్రాన్ని రూపొందిస్తున్నారు. ప్రముఖ శాస్త్రవేత్త నంబి నారాయణ్ జీవితం ఆధారంగా ఈ సినిమా తీస్తున్నారు.
