'జన గణ మన'.. ప్రముఖ దర్శకుడు పూరీ జగన్నాథ్ డ్రీమ్ ప్రాజెక్టు. ఈ సినిమాను 2018లోనే ప్రకటించారు. అగ్ర నటుడు మహేశ్‌బాబు కథానాయకుడుగా నటించబోతున్నారని చెబుతూ పూరీ పోస్టర్‌ను కూడా విడుదల చేశారు. అయితే కొన్ని కారణాల వల్ల ఈ చిత్రం కార్యరూపం దాల్చలేదు. త్వరలోనే ఈ సినిమా పట్టాలెక్కబోతోందని ఇన్నేళ్లకు పూరీ వెల్లడించారు.
" 'జన గణ మన' నేను కలలుకన్న చిత్రం. కచ్చితంగా దీన్ని పాన్‌ ఇండియా సినిమాగా తెరకెక్కిస్తా" అని తెలిపారు. కానీ, కథానాయకుడు ఎవరన్న విషయంపై ఆయన స్పష్టత ఇవ్వలేదు. మరోపక్క ఇటీవల జరిగిన ఇన్‌స్టాగ్రామ్‌ ఛాటింగ్‌లో మహేశ్‌ను పూరీతో సినిమా గురించి ప్రశ్నించగా.. ఆయన కథ చెబుతారేమోనని ఇంకా ఎదురుచూస్తున్నట్లు వెల్లడించారు.
పూరీ ప్రస్తుతం విజయ్‌ దేవరకొండ కథానాయకుడుగా 'ఫైటర్‌' సినిమాను తెరకెక్కిస్తున్నారు. తెలుగుతోపాటు హిందీ, తమిళంలోనూ రూపుదిద్దుకుంటోన్న ఈ సినిమాలో బాలీవుడ్ నటి అనన్యా పాండే కథానాయికగా నటిస్తున్నారు. రమ్యకృష్ణ కీలక పాత్ర పోషిస్తున్నారు. ఇందులోని పాత్ర కోసం విజయ్‌ థాయ్‌లాండ్‌ వెళ్లి మార్షల్‌ ఆర్ట్స్‌లో ప్రత్యేకంగా శిక్షణ తీసుకున్నారు. ఈ సినిమా గురించి విజయ్‌ మాట్లాడుతూ.. 'తెలుగు, హిందీ భాషల్లో ఏకకాలంలో సినిమాను తీస్తున్నాం. మిగిలిన ప్రాంతీయ భాషల్లో డబ్బింగ్‌ చేస్తాం. హిందీలో నా పాత్రకు నేనే డబ్బింగ్‌ చెప్పాలి అనుకుంటున్నా'అని చెప్పారు.
ఇది చూడండి : లేడీ సూపర్స్టార్.. 'సరిలేరు నీకెవ్వరు'!
