priyanka mohan Suriya Et movie: మహిళల్లో చైతన్యం నింపే బాధ్యత కలిగిన పాత్రని పోషించడం ఎంతో తృప్తినిచ్చిందని చెబుతోంది ప్రియాంక మోహన్. న్యాయంగా ఉంటే ఎవ్వరికీ తలవంచాల్సిన పని లేదని చెప్పే అర్థవంతమైన నా పాత్ర సమాజానికి స్ఫూర్తిగా నిలుస్తుందని చెప్పుకొచ్చింది. నానితో కలిసి 'గ్యాంగ్‌లీడర్‌', శర్వానంద్‌తో కలిసి 'శ్రీకారం' సినిమాల్లో నటించి తెలుగు ప్రేక్షకులకు చేరువైన నటి ప్రియాంక. ఇప్పుడు తమిళంలో వరుసగా అవకాశాల్ని అందుకుంటూ సత్తా చాటుతోంది. ఇటీవల సూర్యతో కలిసి 'ఈటి'లో నటించింది. ఈ చిత్రం తెలుగు, తమిళ భాషల్లో ఈ నెల 10న ప్రేక్షకుల ముందుకొస్తోంది. ఈ సందర్భంగా ప్రియాంక మోహన్ చిత్రానికి సంబంధించిన విశేషాలను ముచ్చటించింది. ఆ విషయాలివే..
"స్ఫూర్తిదాయకమైన పాత్రలు ఎప్పుడో కానీ రావు. నాకు ఈ సినిమాతో అలాంటి అవకాశం దొరికింది. రెండు కోణాల్లో సాగే పాత్రలో కనిపిస్తా. ప్రథమార్థం వరకు సరదాగా గడిపే ఓ సగటు అమ్మాయిగా కనిపిస్తా. ద్వితీయార్థంలో ఓ లక్ష్యం కోసం పాటుపడుతుంటా. సూర్యకి సమాన స్థాయి పాత్ర నాది. తమిళంలో ‘డాక్టర్‌’ తర్వాత శివకార్తికేయన్‌తోనే ‘డాన్‌’ చిత్రం చేశా. ఆ సమయంలోనే నాకు ఈ సినిమాలో నటించే అవకాశం వచ్చింది".
"సమాజంలో మహిళలు చాలా మంది ఎదుర్కొనే అంశాలు నా పాత్రలో ప్రతిబింబిస్తాయి. దర్శకుడు పాండిరాజ్‌ ఆయన శైలి నుంచి బయటికొచ్చి చేసిన చిత్రమిది. మహిళలు ఏ రంగంలోనైనా సౌకర్యంగా సంతోషంగా ఉండాలి. పనిలో ప్రతిభ చూపించడమే కాదు, సమస్య వస్తే ఎదుర్కోవడానికీ సిద్ధంగా ఉండాలి. మహిళా దినోత్సవం వారంలోనే మా ‘ఈటి’ సినిమా ప్రేక్షకుల ముందుకొస్తుండడం చాలా ఆనందంగా ఉంది".
- ప్రియాంక మోహన్, హీరోయిన్
మనసుకు నచ్చిన పాత్రలతోనే..
varsha bollamma Rajtarun movie: కొవిడ్ తర్వాత థియేటర్‌కి నేనైతే నవ్వుకోవడానికే వెళ్లాలనుకుంటా. మా సినిమా అచ్చం అలాంటి అనుభూతినే పంచుతుందని చెప్పుకొచ్చింది వర్ష బొల్లమ్మ. 'విజిల్‌', 'జాను', 'చూసీ చూడంగానే', 'మిడిల్‌క్లాస్‌ మెలోడీస్‌' తదితర చిత్రాలతో తెలుగు ప్రేక్షకులకు చేరువైన కథానాయిక ఈమె. ఇటీవల రాజ్‌తరుణ్‌తో కలిసి 'స్టాండప్ రాహుల్'లో నటించింది. శాంటో మోహన్ వీరంకి దర్శకత్వం వహించిన ఆ చిత్రం ఈ నెల 18న విడుదలవుతోంది. ఈ సందర్భంగా వర్ష బొల్లమ్మ చిత్ర విశేషాలు ఇలా చెప్పుకొచ్చింది.
ఇందులో మీ పాత్ర ఎలా ఉంటుంది?
శ్రేయ అనే నవతరం అమ్మాయి పాత్రలో కనిపిస్తా. తనకంటూ కొన్ని కలలు ఉంటాయి. తన కలలతోపాటుగా తన భాగస్వామి కలలు నా పాత్రలో మిళితమై ఉంటాయి.
రాజ్‌తరుణ్‌తో కలిసి నటించడం ఎలా అనిపించింది?
చాలా సినిమాలు చేశారు, ఆయన ఎలా ఉంటారో అనుకున్నా. ఈ సినిమా కోసం వర్క్‌షాప్‌ చేస్తున్నప్పుడే తను, నేను ఒకే రకమైన ఆలోచనలతో ఉన్నవాళ్లం అనిపించింది. దాంతో ఆయనతో నటించడం నాకు సౌకర్యంగా అనిపించింది. అయితే ఇలా స్టాండప్ కామెడీ సినిమా చేస్తున్నానని చెప్పగానే నేనే ఆ పాత్రలో కనిపిస్తానేమో అనుకున్నారు. అవకాశం నాకు రాలేదు. కామెడీ సినిమా నేను ఇదివరకు చేయలేదు. ఆ కోరిక ఈ చిత్రంతో తీరింది.
మీ కెరీర్‌ గురించి ఏం చెబుతారు?
నేను కూర్గ్‌లో పుట్టి పెరిగాను. బెంగళూరులో చదువుకున్నా. నా కుటుంబానికీ, చిత్ర పరిశ్రమకీ ఏ సంబంధమూ లేదు. నాకు ఆసక్తి ఉందనగానే తల్లిదండ్రులకి సినిమా గురించి ఏమీ తెలియకపోయినా ప్రోత్సహించారు. ప్రతీ రోజూ ఏదో ఒక విషయం నేర్చుకుంటూ ప్రయాణం చేస్తున్నా.
ఎలాంటి పాత్రలంటే ఇష్టం? వస్తున్న పాత్రలపై సంతృప్తిగానే ఉన్నారా?
నేను ప్రత్యేకంగా నియమాలేమీ పెట్టుకోలేదు. పదేళ్ల క్రితం నాటికీ, ఇప్పటికీ పాత్రల తీరుతెన్నుల్లో చాలా మార్పులు వచ్చాయి. అందుకు తగ్గట్టే ప్రయాణం చేస్తున్నా. మనసుకు నచ్చిన పాత్రలతో ప్రయాణం చేస్తుంటా. ‘స్వాతిముత్యం’ అనే సినిమా చేస్తున్నా. దాంతోపాటు మరో చిత్రానికి సంతకం చేశా.
ఇదీ చదవండి: హీరోయిన్ల జోరు.. వరుస సినిమాలతో హోరు
