నటుడు నాగబాబు బాలీవుడ్ ఎంట్రీకి రంగం సిద్ధమైనట్లు తెలుస్తోంది. టాలీవుడ్‌లో బ్లాక్‌బస్టర్గా నిలిచిన 'ఛత్రపతి' రీమేక్‌తో ఆయన బీటౌన్‌లోకి వెళ్లనున్నారని వార్తలు వస్తున్నాయి.
రాజమౌళి దర్శకత్వంలో ప్రభాస్‌ నటించిన సూపర్‌హిట్‌ చిత్రం 'ఛత్రపతి'. ఈ చిత్రాన్ని హిందీలోకి రీమేక్ చేసేందుకు సన్నాహాలు జరుగుతున్నాయి. బెల్లంకొండ సాయి శ్రీనివాస్‌ కథానాయకుడిగా తెరకెక్కనున్న ఈ రీమేక్‌ను ప్రముఖ దర్శకుడు వి.వి.వినాయక్‌ రూపొందించనున్నారు.
సినీవర్గాల సమాచారం మేరకు.. నాగబాబు ఈ సినిమాలో ప్రతినాయకుడిగా కనిపించనున్నట్లు తెలుస్తోంది. ఈ విషయమై ఇప్పటికే నాగబాబుతో చిత్రబృందం చర్చలు జరిపినట్లు బీటౌన్‌లో టాక్‌ వినిపిస్తోంది. ఈ క్రమంలోనే నాగబాబు కూడా తన పాత్ర కోసం సిద్ధమవుతున్నారని ప్రచారం జరుగుతోంది. అయితే, సదరు వార్తలపై ఎటువంటి అధికారిక ప్రకటన వెలువడలేదు.
ఇదీ చూడండి: 'ఎప్పుడూ పాజిటివ్గా ఉండేందుకే ప్రయత్నిస్తా'
