ఇది వరకు తమన్ అంటే... ఫాస్ట్‌ బీట్‌ గీతాలే గుర్తొచ్చేవి. ఇప్పుడు రూటు మార్చి మెలోడీకి అధిక ప్రాధాన్యం ఇస్తూ సినిమాలు చేస్తున్నాడు. సంగీత ప్రపంచంలో ఇటీవల కాలంలో అతడిదే హవా. ఈ నెలలో విడుదలవుతున్న రెండు పెద్ద చిత్రాలు 'వెంకీమామ', 'ప్రతిరోజూ పండగే'లకు సంగీతం అందించింది తమనే. సంక్రాంతికి రానున్న 'అల వైకుంఠపురములో' చిత్రానికీ అతడే స్వరాలు సమకూరుస్తున్నాడు. 'వెంకీమామ' ఈనెల 13న విడుదలవుతోంది. ఈ సందర్భంగా తమన్ చెప్పిన ముచ్చట్లివీ.
ఈ మధ్య జోరు పెంచినట్టున్నారు?
అవును. వైవిధ్యమైన కథలు వస్తున్నాయి.
మీరు బాణీలు స్వరపరిచే విధానం కూడా మారినట్టుంది?
అవును. 'సరైనోడు' తర్వాత ఏడాది పాటు విరామం తీసుకున్నాను. ఎలాంటి సినిమాలు చేయాలి? ఎలాంటి పాటలు చేయాలి? అనే విషయంలో నాలో నేను తర్జన భర్జనలు పడ్డాను. 'మహానుభావుడు', 'తొలిప్రేమ' చిత్రాలతో నా సంగీతంలో మార్పు కనిపించింది.
- " class="align-text-top noRightClick twitterSection" data="">
విమర్శల్ని మీరు ఎలా స్వీకరిస్తారు?
పొగిడేవాళ్లే కాదు.. తిట్టేవాళ్లూ ఉండాలి. ఎవరూ ఊరికే తిట్టరు కదా? వాళ్లని మెప్పించడానికి ప్రయత్నిస్తూ ఉండాలి. చిన్నప్పుడు అమ్మ తిట్టకపోతే మనం తప్పుల్ని సరిదిద్దుకునే వాళ్లమా?
'వెంకీమామ'లో మిమ్మల్ని ఆకట్టుకున్న అంశాలేంటి?
ఇప్పుడు నేను చేస్తున్న 'వెంకీమామ', 'ప్రతిరోజూ పండగే', 'అల.. వైకుంఠపురములో' ఇవన్నీ చాలా మంచి కథలు. 'వెంకీమామ'తో అయితే చాలా అనుబంధం పెంచుకున్నా. ఆర్‌.ఆర్‌, ఎలాంటి ఎఫెక్ట్స్‌ లేకుండా సినిమా చూస్తున్నప్పుడే నన్ను చాలా కదిలించేసింది. "ఈ సినిమా ఇలానే ఇవ్వు.. నేను మంచి ఆర్‌.ఆర్‌ ఇస్తా" అని దర్శకుడు బాబితో చెప్పాను. వెంకీ, చైతూ పోటీ పడి నటించారు. నిజ జీవితంలో వాళ్ల అనుబంధం ఎంత బలంగా ఉంటుందో తెరపై కనిపిస్తుంది.
ఓ సినిమా ఒప్పుకునేటప్పుడు కథ పూర్తిగా వింటారా?
'వెంకీమామ' లాంటి భావోద్వేగభరిత చిత్రాలకైతే కథ పూర్తిగా వినాలి. అప్పుడే ఎలాంటి పాటలు చేయాలో, ఆర్‌.ఆర్‌లో ఎంత ఫీల్‌ ఉండాలో ముందే అంచనాకు రాగలం. గీత రచయితలకు సందర్భం చెప్పి, తగిన పాటలు రాబట్టుకోవాలన్నా కథ పూర్తిగా తెలిసుండాలి.
రీమిక్స్ గీతాలకు ఈమధ్య దూరం జరిగినట్టున్నారు?
ఎందుకొచ్చిన తలనొప్పి? అనుకున్నానంతే. రీమిక్స్ చేస్తే ఒరిజినల్‌ పాట పాడినవాళ్లు, రాసినవాళ్లు, సంగీతం చేసినవాళ్లు నన్ను తిట్టుకుంటారు. అంతెందుకు... నాకో అరవై ఏళ్లు వచ్చాక ఎవరో నా పాటని రీమిక్స్ చేస్తే నేనే తిట్టుకుంటాను.
- " class="align-text-top noRightClick twitterSection" data="">
హీరోల మధ్య ఉన్నట్టు సంగీత దర్శకుల మధ్య కూడా పోటీ ఉంటుందా?
అలాంటిదేం ఉండదు. మాలో మేము బాగానే ఉంటాం. మాకు వాట్సాప్‌ గ్రూపులు కూడా ఉన్నాయి.
ఒక్కోసారి పాటలో గాయకుల డామినేషన్‌ కనిపిస్తుంది. పాట క్రెడిట్‌ మొత్తం వారికే వెళ్లిపోతుంటుంది. అలాంటప్పుడు ఏమనిపిస్తుంది?
సంతోషమే కదా? నేను ఎంపిక చేసిన గాయకుడికే కదా మార్కులు వెళ్లేవి. సచిన్‌ సెంచరీ చేస్తే మిగిలిన ఆటగాళ్లు బాధపడరు కదా? పాటకి మంచి జరిగితే చాలు.
ఇవీ చూడండి.. 'నాన్నకు ప్రేమతో'లో విలన్గా అరవింద్ స్వామి.. కానీ..!
