వెండితెరపై ఎప్పుడూ మేకప్తోనే కనిపించే కథానాయికలు ప్రస్తుతం వినూత్న ప్రయోగాలకు తెరతీస్తున్నారు. ఇటీవల ముఖానికి రంగు లేకుండా ఉన్న చిత్రాలను సినీ తారలు కాజల్, హంసా నందిని సామాజిక మాధ్యమాల్లో పంచుకున్నారు. అదే కోవలోకి బాలీవుడ్ భామ కీర్తి కుల్హరి చేరింది. అయితే వారిలా కాకుండా ఈమె ఓ అడుగు ముందుకేసి ఓ సినిమాలో మేకప్ లేకుండా నటిస్తోంది.
సహాయ నటిగా 'పింక్‌' (2016), 'ఉరి: ది సర్జికల్‌స్ట్రైక్స్‌' (2019), 'మిషన్‌ మంగళ్‌' (2019) చిత్రాల్లో కనిపించింది కీర్తి. ఆమె ప్రస్తుతం హాలీవుడ్‌ చిత్రం 'ద గర్ల్ ఆన్ ద ట్రైన్’' హిందీ రీమేక్‌లో ఓ కీలక పాత్ర పోషిస్తోంది. ఈ సినిమా చిత్రీకరణ లండన్‌లో జరుగుతోంది. ఇందులో ఆమె మేకప్ లేకుండా నటిస్తోంది.
" మేకప్ లేకుండా 'ద గర్ల్ ఆన్ ద ట్రైన్' చిత్రంలో నటించబోతున్నా. నిజంగా చాలా ఆనందంగా ఉంది. ముఖానికి రంగు వేసుకోకుండా ఓ సినిమాలో నటిస్తానని ఎప్పుడూ అనుకోలేదు. అయినా పాత్రలో బలం ఉంటే చాలు తెర మీద చక్కగా కనిపిస్తాం".
- కీర్తి కుల్హరి, సినీ నటి
రిభు దాస్‌ గుప్తా దర్శకత్వం వహిస్తోన్న ఈ సినిమాలో పరిణీతీ చోప్రా కథానాయిక. అదితీ రావ్‌ హైదరి మరో కీలక పాత్రధారి. ఈ సినిమాను వచ్చే ఏడాది ప్రేక్షకుల ముందుకు తీసుకొచ్చేందుకు ప్రణాళికలు రచిస్తోంది చిత్రబృందం. రిభు దాస్‌గుప్తా దర్శకత్వంలోనే 'బార్డ్‌ ఆఫ్‌ బ్లడ్‌' అనే వెబ్‌ సిరీస్‌లో నటించింది కీర్తి. సెప్టెంబరు 27న నెట్‌ఫ్లిక్స్‌లో ఈ సిరీస్‌ ప్రసారం కానుంది.
ఇవీ చూడండి.. కరణ్ పార్టీలో విమర్శలపై విక్కీ కౌశల్ రియాక్షన్
