ఏ సినిమాకైనా సంగీతం ఎంత ప్రాముఖ్యం వహిస్తుందో.. నేపథ్య సంగీతం అంతే ముఖ్యం. అలాంటిది మెగాస్టార్ చిరంజీవి హీరోగా నటించిన 'సైరా' కోసమైతే మరింత జాగ్రత్త తీసుకోవాలి. అందుకే బాలీవుడ్ నుంచి ప్రముఖ బ్యాక్గ్రౌండ్ స్పెషలిస్ట్ జూలియస్ పేకియమ్ను తీసుకొచ్చారు. హిందీ చిత్రాలతో ఇప్పటికే గుర్తింపు పొందిన ఈ సంగీత దర్శకుడు.. 'సైరా'తో టాలీవుడ్కు పరిచయమవుతున్నాడు.
ఎక్కువగా సల్మాన్ఖాన్ చిత్రాలకు నేపథ్య సంగీతమందించి ఆకట్టుకున్నాడు పేకియమ్. ఏక్ థా టైగర్, టైగర్ జిందా హై, బజరంగీ భాయిజాన్, సుల్తాన్, భారత్, ట్యూబ్లైట్తో పాటు మిగతా హీరోలు నటించిన బాఘీ, భాఘీ 2, ధూమ్ 3 చిత్రాల్లో తన ప్రతిభను చూపించాడు. ఇప్పుడు తెలుగులోనూ సత్తా చాటేందుకు సిద్ధమవుతున్నాడు.
ఉయ్యాలవాడ నరసింహారెడ్డి జీవితం ఆధారంగా తెరకెక్కిన 'సైరా'.. అక్టోబరు 2న ప్రేక్షకుల ముందుకు రానుంది. ఇప్పటికే టీజర్ అలరిస్తోంది. అమితాబ్ బచ్చన్, కిచ్చా సుదీప్, విజయ్ సేతుపతి, నయనతార, తమన్నా తదితరులు ఇందులో కీలక పాత్రలు పోషించారు. అమిత్ త్రివేది సంగీతమందించాడు. రామ్చరణ్ నిర్మాత.
ఇది చదవండి: నిజమైన మెగాస్టార్ అమితాబ్ బచ్చనే: చిరంజీవి
